УИХ-ын Эдийн засгийн байнгын хороо, Монголбанк хамтран зохион байгуулж буй “Тинк банк 2019-мөнгө санхүүгийн орчин” хэлэлцүүлэг өнөөдөр Төрийн ордонд болж байна. Энэ үеэр Глобал эдийн засгийн хүрээлэнгийн захирал Р.Амаржаргал "Гадаадын банкны санхүүгийн зах зээлд үзүүлэх нөлөө, нэвтрүүлэхэд тохиолдох эрсдлийг бууруулах арга зам” сэдвээр илтгэл тавьсан юм. Тэрбээр, "Банкны салбарын тоо, баримт үнэн эсэхэд би эргэлздэг. Арилжааны банкууд тайлангаа өгөхгүй байна. Гурав, дөрвөн жил тайлан гаргаж өгөөгүй банкууд байна. Судалгааны явцад энэ бүхэн нь ил тод харагдсан. Бид хамгийн энгийн, болхи, бүдүүлэг тестийг хийсэн.

Банкны салбарт гадаадын банк орж ирвэл гэсэн судалгааг цаашид гаргахын тулд нийлмэл шокийн аргад оруулан гаргавал тун сонирхолтой, практик ач холбогдолтой болох болов уу гэж бодож байна. Банкны салбарын хөрөнгө оруулалт гэдэг бол Оюутолгойд хөрөнгө оруулахаас өөр зүйл. Арилжааны банкийг системийн хувьд шинжлэх гэж оролдсон. Гаднаас банк ороод ирэхэд арилжааны банканд ямар нөлөө үзүүлэх вэ гэдгийг гаргаж ирэх бололцоо байгаа ч өнөөдрийг хүртэл хийгдээгүй байна. Гадаадын төрийн өмчийн банкны оролцоог нарийвчлан үзэх шаардлагатай. Мөн манай улсад орж ирэх зорилгыг, эдийн засаг үзүүлэх нөлөөллийг цаашид судалж үзэх нь зүйтэй.

Тэдний хийсэн судалгаагаар өнөөдрийн нөхцөлд бий болгох нөхцөлөөс илүү эрсдэл өндөр байна гэсэн судалгааг хийсэн. Мөн гадаадын банкны орж ирэх хэлбэрт анхаарах, зохицуулалт мөн чухал байгааг онцолж байна” гэлээ. Мөн тэрбээр “Олон зүйлийг бодож, тооцоолохгүй бол сэлэм эргүүлж дайраад болдог зүйл биш шүү. Өөрийн орны санхүүгийн нөхцлийг харж байж нэвтрүүлэхгүй бол энд тийм сайхан юм байна, тэнд тийм сайхан юм байна гээд нэг их юм үзсэн хүн шиг загнаад байж болохгүй. Манай санхүүгийн зах зээл үндсэндээ нялх хүүхэд шиг байна. Зарим тохиолдолд улс төрийн зориг гаргах шаардлагатай. Энэ бол удаан, цаг хугацаа шаардаж, улс төрийн тэвчээр зориг шаардана. Эдийн засгийн активаа өргөтгөх чиглэлээр төр үйл ажиллагаа хийх хэрэгтэй. Бизнест байгаа активыг булааж аваад байж болохгүй” гэв.

Р.Хишигээ