БСШУС-ын сайд Ё.Баатарбилэг зөвлөхөөрөө “элэгний” гэгддэг Ж.Хатанбаатарыг ажиллуулахаар шийдвэрлэжээ. Та бүхэн санаж байгаа бол 2014 оны арванхоёрдугаар сарын сүүлчээр Ч.Сайханбилэгийн Засгийн газар байгуулагдахад МАХН-д Эрүүл мэндийн сайдаа томилох боломж өгч байсан. Тэгэхэд Архангайн Ж.Жамбалжав, Ж.Хатанбаатар нарын эмч нарыг нэр дэвшүүлж нэлээд сурталчилж тэр ч байтугай “түүний сэтгэл заслын эмчилгээ Бээжингийн олимпын хоёр аваргыг ч төрүүлсэн” гэхчлэн “мандуулж” билээ.

Ардын эмч, Хүний гавьяат эмч Ж.Хатанбаатар энэ удаад БСШУС-ын сайдын зөвлөхөөр ажиллах болсон нь мөнөөх л “Архангайнхны явуулга” болж таарах нь. У.Хүрэлсүхийн Засгийн газарт Ё.Баатарбилэгийг “шахаж” чадсан Т.Бадамжунай одоо Ё.Баатарбилэгтээ Ж.Хатанбаатарыг “шахаж” байгаа нь энэ. Мэдээж энэ бол тухайн сайдын сонголт хэдий ч Ж.Хатанбаатарыг хүлээж авмааргүй байсан боловч зөвлөхөөр авах шаардлагатай тулгарсан байж болно. Ж.Хатанбаатар энэ нь салбартаа юугаараа ашигтай бас хохиролтой юм бэ гэдэг л хамгийн гол нь.

Ж.Хатанбаатар бол МАХН-ын гишүүн. Н.Энхбаяртай нэг нутаг усных гэдгээс эхлээд “Бурхан багшийн сургаал” номыг хамтран орчуулж, сүм хийд, энергийн төвүүд, элдэв рэнбүүчи нартай  холбогдож явсаар шадарлаж зөвлөхөөр нь хүртэл ажиллажМАХН-ыг байгуулахад нь ч дагаад намд нь орж байж. Сайдаар Н.Удвал, Г.Шийлэгдамба, Төрийн нарийн бичгийн даргаар Ж.Хатанбаатарыг томилсноос харахад Эрүүл мэндийн яам Н.Энхбаярынх байсан.

2013 оны долдугаар сар. Монгол Улсын Хүний гавьяат эмч , Анагаах ухааны доктор, профессор  Л.Жамбалжав хэвлэлийнхэнд мэдээлэл хийж, “Эрүүл мэндийн яамны дэргэдэх төрийн албаны салбар зөвлөл хууль зөрчиж байгаа нь түүнийг толгойлож байгаа салбар зөвлөлийн дарга Ж.Хатанбаатартай холбоотой” гэх мэдээллийг олон нийтэд өгч байв. Тэрбээр “Эрүүл мэндийн яамны харьяа хэдэн эмнэлгийн дарга нарын сонгон шалгаруулалтыг зарласан. ЭМЯ-ны салбар зөвлөл болон шалгалт авах комиссыг дахин шинээр байгуулж сонгон шалгаруулалт явуулах гэж зорьж байгаа нь анхаарал татаж байгаа бөгөөд хууль бус ажиллагаа юм. Энэ үйл ажиллагаанд төрийн албаны зөвлөлийн зарим ажилтан, тухайлбал Даваа-Очир гэгч Эрүүл мэндийн сайдын сонгон шалгаруулах ажиллагааг түр хойшлуулах тухай албан ёсны хүсэлтийг үл хэрэгсэн ЭМЯ-ны Төрийн нарийн бичгийн дарга Ж.Хатанбаатартай үгсэн хуйвилдаж анхаарах зүйл байсаар байтал тоохгүй хууль бус ажиллагаа явуулсан.  ЭМЯ-ны салбар зөвлөлийг толгойлж байгаа Ж.Хатанбаатар нь хувийн маш их сонирхолтой ЭМЯ-ны аппаратын ажлыг удирдах албан үүргээ гүйцэтгэж чаддаггүй,  хов яриж хамт олны итгэлцлийг алдагдуулж, ЭМЯ-ны үндсэн үйл ажиллагааг хэрэгжүүлэх ажлыг зохион байгууллаж чадахгүй удаа дараа алдаа гаргаж байгаа. Мөн  Эрүүл мэндийн сайдын зөвөлгөө үүрэг даалгавар шийдвэрийг биелүүлэхгүй сүүлийн гурав, дөрвөн сарын турш эрүүл мэндийн сайдтайгаа уулзаж учирдаггүй төрийн албаны ёс зүйг алдсан гэж хамт олны дунд яригдаж байгаа хүн юм. Ж.Хатанбаатар нь ажилдаа тэнцэхгүй учир ажлаас чөлөөлөгдөхөөр мэдэгдэл аваад байгаа гэж байсан” гэхчлэн мэдээлсэн юм. Ингээд өөрөө ажлаас чөлөөлөгдөж байгаа ч эмнэлгийн дарга нарыг томилох ажиллагаанд хууль бус ажиллагаа хийсэн гэх түүхтэйгээр ажлаа өгсөн.

Харин одоо Н.Энхбаярын амны ус, албаны цүнхийг барьж гүйдэг Шадар туслахаар ажиллаж байсан Ё.Баатарбилэг Архангайн Засаг даргын суудлаас УИХ-ын гишүүн, улмаар БСШУС-ын сайд болоод Н.Энхбаярын зөвлөх байсан Ж.Хатанбаатарыг өөрийн зөвлөхөөр ажииллуулах нь. Өөрөөр хэлбэл БСШУС-ын салбарыг Н.Энхбаярынх болгох замаа засч эхэллээ.

Ж.Хатанбаатар одоогоор Допингийн эсрэг үндэсний төвийн ерөнхийлөгчийналбан ёсны сонгуульт ажилтай.

2016 оны хоёрдугаар сар. МҮОХ-ны гүйцэтгэх зөвлөлийн хурлаас “Рио-2016" олимпийн наадамд оролцох Монгол Улсын баг тамирчдыг МҮОХ-ны дэд ерөнхийлөгч, доктор Ж.Хатанбаатар ахлах шийдвэрийг” гаргаж байв. Түүний орлогчоор  ардын багш Ц.Дамдин ажиллахаар болсон нь Ж.Хатанбаатар, Д.Загдсүрэн хоёрын хамтын ажиллагааны сүр хүчийг харуулсан төдийгүй 2012 оны олимпын үеэр Бээжингийн аваргатай болоход “оруулсан хувь нэмрийнх” нь үр дүн бололтой юм. Түүний ахалсаны “үр дүнд” Рио 2016 наадмын сүүлчийн өдөр Спортын Арбитрын Шүүхээс сэргээш илэрсэн шалтгаанаар тус наадмын хүндийг өргөлтийн 56 кг жинд өрсөлдсөн манай тамирчин Ө.Чагнаадоржийн үр дүнг цуцалсныг та бүхэн санаж байгаа байх. Спортын арбитрын шүүхийн мэдэгдэлд 19 настай Чагнаадоржоос тестостерон хэмээх сэргээшийн төрлийн бодис илэрсэн гэсэн бөгөөд үүгээр манай тамирчин Рио 2016 наадмын туршид шинжилгээнээс нь сэргээш илэрсэн долоо дахь тамирчин болсон.  Мөн 2012 онд Азийн аварга шалгаруулах тэмцээнд оролцсон гавьяат тамирчин Н.Баярмаагаас анаболик стероид илэрсэн нь допингийн эсрэг мэдээллийн вэб хуудаснаа жагсаалтад орсон байдаг. Бүр хоёр ч удаа илэрсэн гэдэг. Хүндийг өргөлтийн холбоог МҮОХ-ны Ерөнхийлөгч Д.Загдсүрэн тэргүүлдэг. Тэр өөрөө эмч хүн гэдгээрээ бахархаж энэ суудалд 20 жил тухаллаа. Допингийн эсрэг төвийн дарга Ж.Хатанбаатартайгаа ч нягт хамтарч ажиллаад удаж байна.

Ж.Хатанбаатарын даргалдаг Допингийн эсрэг төв яаж ажил хийж байна вэ. Хааяа нэг олон улсын хуралд оролцсон, тайлан төлөвлөгөө хэлэлцэх, МҮОХ, Эмнэлэг, эрдэм шинжилгээний комисстой хамтран спорт холбоодын удирдлага, дасгалжуулагчдад зориулан сургалт зохион байгуулах, БСШУСЯ-тай хамтран сүртэй нэртэй төсөл хэрэгжүүлснээ ярьж хуралдахаас өөрөөр тус байгууллагын ажлын сайн үр дүнг “олоход” амаргүй юм. Хэрэв тэдгээр нь үр дүнтэй байдаг бол тамирчид маань санамсар болгоомжгүйгээс болж допингийн асуудалд холбогдох нь жилээс жилд нэмэгдэх учиргүй. 

Өнөөдрийг хүртэл Монголын тамирчдаас хэдэн хүн допингийн асуудалд орооцолдов. П.Орхон яагаад допингийн асуудлаас хохирч эрхээ хасуулав гэдэг талаар МҮОХ-ны удирдлага ч, Допингийн эсрэг үндэсний төвийн ерөнхийлөгч ч ганц үг ганхийж байсангүй. Ерөөсөө допингийг эсэргүүцдэггүй улс орон мэт ажилдаа хайнга ханддагийн жишээ энэ. Ийм ажлын үзүүлэлтийг нь өөр салбарын сайдын зөвлөхийн суудлаар “шагнаж” байгаагаас харахад Н.Энхбаярын бүлэглэл Эрүүл мэндийн салбараас Спортын салбар руу нүүж байна. МАН боломжийн боловсон хүчинтэйгээрээ гайхуулдаг ч энэ удаад МАХН-ын боловсон хүчнийг ажлын үр дүн, туршлага, намтар цадигийг нь үл харгалзан оруулж ирж байгааг харахад Н.Энхбаярын давшилт нэг л мэдэхэд МАН-ыг, төрийг эзлэх буй за.

О.Балдан-Очир