НИТХ-ын төлөөлөгч Ц.Баатархүүгээс хотын даргад хэнийг дэмжих талаар тодрууллаа.

-Нэр дэвшиж байгаа хүнийхээ дэвшүүлсэн төлөөлөгчийг тооллогын комисст оруулах боломжгүй байсан юм уу?

-Уг оруулаад санал хураалт явуулах гэж байсан юм. Тооллогын комисст нэг хүнийхээ нэрийг оруулж, санал хураалт явуулах гэж байтал МАН-ын бүлэг гэнэт завсарлага авчихлаа. Энэ бол санамсаргүй юм болсон.

-Хотын даргын томилгоо чухал болохоос бус тооллогын комиссын таван гишүүнийг сонгох нь чухал асуудал биш. Энд яагаад ингээд удаж байгаа юм бол?

-Хотын даргын асуудал дээр тооллогын комисст нам, эвслүүд яагаад ингэж анхаарч байна вэ гэхээр хэрвээ сонгох үйл явц хууль зөрчихвөл шүүхэд очдог. Хотын даргыг сонгосноосоо их юм болдог. Тиймээс хууль журмын дагуу шийдье гэдэг саналтай байгаа.

-Ээлжилж завсарлага авч байгааг улстөржиж байна гэх хардлага төрүүлж байна?

-Нэгэнт 34 суудалтай МАН бидэнтэй, бидэнгүй асуудлаа шийдэх боломжтой. Орж ирээд нэг хүний нэрийг дэвшүүлээд олонхоороо шийдүүлэх бүрэн боломжтой.

-Өнөөдөр хотын даргыг томилж, амжих болов уу?

-Өнөөдөр амжих ёстой өөр арга байхгүй.

-Аль нэг бүлэг нь дахиж завсарлага авах боломжтой юу?

-Хүчин төгөлдөр мөрдөгдөж байгуу хууль, дэгд нэг тодорхойгүй зүйл бий. Энэ нь асуудалд хэдэн удаагийн завсарлага авахыг тусгаж өгөөгүй. Иймээс бүлгүүд олон удаагийн завсарлага авах боломжтой гэсэн үг. Тухайлбал, МАН ээлжит 21 дүгээр чуулганд долоон удаа завсарлага авсан байна. Онын өмнө эхэлсэн хурал дуусаагүй байна. Үүнээс нийслэлийн удирдлага, НИТХ засаглаж чадахгүй байна. Улаанбаатар хотын удирдлагыг тасралтгүй, тогтвортой хэрэгжүүлэх боломжоо алдлаа гэж дүгнэж байна.

-АН-ын зүгээс дахиад завсарлага авах уу?

-АН-ын зүгээс завсарлага авахгүй байх. Тийм шалтгаан байхгүй. Бид тооллогын комисст хүнээ дэвшүүлнэ. Энэ нам олонхоороо түрий бариад унагах уу, хяналтаа тавь гээд оруулах уу гэдгийг хэвлэл мэдээллийн байгууллагынхан хянах хэрэгтэй. Мөн миний зүгээс хэвлэл мэдээллийнхнийг ажиглагчаар оролцоосой гэж хүсч байна. Яагаад энэ асуудалд ингэж их ач холбогдол өгч, хүч хаяж олуулаа ирж цуглаж байгааг ард түмэнд харуулах шаардлагатай.

-АН-ын бүлэг С.Амарсайханыг дэмжихгүй байгаа учраас ийм нөхцөл байдал үүслээ гэж хардах хүн цөөнгүй байна?

-АН-ын бүлэг хэнийг дэмжих вэ гэдэгт саналаа нэгтгээгүй. Төлөөлөгчид хэнд ямар санал өгөх нь нууц байдаг. Төлөөлөгчийг хэнд санал өгч байгааг харах боломж байдаггүй.

-Төлөөлөгчдийн суудлыг сольж, саналыг нь хянаад байна гэдэг асуудал яригдлаа?

-Дэгийн дагуу төлөөлөгч бүр өөрийн нэртэй суудал дээр суудаг. Харин өнөөдрийн нэг онцлог зүйл нь эрх баригч намын төлөөлөгч бүр өөр суудал дээр суусан байсан. Анзаараад харахад санал өгөхгүй байгаа хэсэг хүмүүс байдаг. Тэр хүмүүсээ бусад нь хянаж байгаа юм билээ. Тиймээс эрх баригчид энэ асуудалд дотоод ардчилалгүй хандаж байна гэж харагдсан.

Р.Хишигжаргал