АНУ-ын Ерөнхийлөгч Дональд Трамп БНАСАУ-ын удирдагч Ким Жөн Ун нарын хийж буй хоёр дахь удаагийн дээд хэмжээний уулзалтын сүүлийн өдөр эхэллээ.

Тэд өчигдөр орой зоог барихын өмнө ганцаарчилсан уулзалт хийсэн бөгөөд уулзалт 20 минут үргэлжилсэн байна. Тодруулбал, айлчлалын хуваарийн дагуу хоёр орну уулзалт орон нутгийн цагаар 18.40 минутад эхэлж, 19.00 цагт дуусчээ.  Энэ удаагийн уулзалтын гол зорилго нь Пхеньяны цөмийн зэвсгийг шалгах хугацаа болон устгах асуудлыг тохиролцох ч талууд өчигдөр ямар нэгэн зөвшилцөлд хүрч чадалгүй уулзалтыг дуусгасан юм.

Харин өнөөдөр талууд уулзалтын хамгийн гол хэлэлцээгээ хийх ёстой. Хоёр орны удирдагчид өнөөдөр мөн Солонгосын хойгийг цөмийн зэвсгээс ангижруулах чиглэлээр хэлэлцэх төлөвтэй байна.

Энэ талаар ч Дональд Трамп өчигдөр Ким Жөн Унтай хийсэн уулзалтынхаа дараа өөрийн цахим хуудаснаа жиргэсэн юм.

Тэрбээр “Бид хоёул хамтарсан яриа хэлэлцээрээс гарсан өмнөх үр дүнг бататган, үргэлжлүүлэх хүсэлтэй байна. Вьетнам Улс өнөөдөр хурадацтай өсч байгаа орнуудын тоонд ороод байна. Хэрэв БНАСАУ цөмийн зэвсгээсээ салбал мөн хурдацтайгаар хөгжих боломжтой” хэмээн өөрийн цахим хуудсандаа жиргэжээ.

Харин БНАСАУ-ын удирдагч Ким Жөн Ун өчигдөр хийсэн мэдэгдэлдээ хүн бүрт тааламжтай эерэг үр дүн гарна гэдэгт итгэлтэй байгаагаа илэрхийлээд, ийм үр дүнд хүрэхийн төлөө чадах бүхнээ хийхээ мэдэгдсэн байна.

Гэвч Цагаан ордны зүгээс энэ удаагийн уулзалтыг төдийлөн үр дүн багатай байх хандлагатай хэмээн таамаглаж байгаа юм байна. 

Ингээд тэдний уулзалтын сүүлийн өдөр амжилттай хэлэлцээр хийж чадсан эсэхийг бид дахин мэдээлэх болно.