Монгол Улсын Ерөнхийлөгч Х.Баттулга тусгай олимпын зуны наадамд эх орноо төлөөлөн оролцох баг тамирчдыг хүлээн авч уулзлаа.

Тодруулбал, энэ сарын 8-аас 22-ны өдрүүдэд Арабын Нэгдсэн Эмират улсын Абу Даби хотноо оюуны бэрхшээлтэй хүмүүсийн тусгай олимпын зуны наадам болох юм.

Энэ талаар Тусгай олимпын хорооны гүйцэтгэх захирал Б.Алтанцэцэг “Монголын тусгай олимпын хороо таван жилийн өмнө байгуулагдсан юм. Энэ нь оюуны бэрхшээлтэй хүүхдүүдийг биеийн тамир, спортоор дамжуулан эрүүлжүүлэх, чийрэгжүүлэх, нийгэмших, найз нөхөдтэй болгох, нийгмийн хандлагыг өөрчлөх зорилготой.

Тусгай олимпын зуны наадамд нийслэлийн тусгай дөрвөн сургуульд сурагчдын төлөөлөл, хөдөө орон нутагт амьдардаг оюуны бэрхшээлтэй хүүхдүүдийн төлөөлөл зуны олимпод оролцоно. Мөн тусгай олимпын нэг онцлог нь оюуны бэрхшээлтэй хүүхдүүд оюуны бэрхшээлгүй хүүхдүүдтэй хамтарч, багийн спортоор өрсөлддөг. Тиймээс хөлбөмбөг, ширээний теннис хамтарч тоглохоор үе тэнгийнх нь хамтран тоглогч нар мөн Абу Дабид очно” гэв.

Энэ удаагийн олимпод дэлхийн 192 орны 7000 гаруй тамирчин өрсөлдөх бөгөөд манай улсаас нийт 28 тамирчин эх орноо төлөөлөн оролцох юм.

Энэ үеэр Монгол Улсын Ерөнхийлөгч Х.Баттулга “Найзуудаа манлайлж, итгэл найдвар, эерэг сэтгэлгээг бэлэглэн, спортоор хичээллэж, амжилттай яваа тамирчин хүүхэд залуус Та бүхнээр бахархаж байна” хэмээгээд уг тэмцээнд оролцогчдод амжилт хүсэв.