УИХ-ын гишүүн О.Баасанхүүү “Эрдэнэт”-ийн 49 хувьтай холбоотой асуудлаар мэдээлэл хийлээ.

Тэрээр “Одоогийн УИХ-ын дарга Г.Занданшатартай “Эрдэнэт”-ийн 49 хувийн асуудлаар ярилцаж, Эрүүгийн хуулийн дагуу мэдээллийг хүлээн авч эрүүгийн хэрэг үүсгэж, АТГ, цагдаагийн хүрээнд хамтарсан шалгалт явагдаж байна. Би 60 хувийн мэдээлэл гарсан гэж ойлгож байгаа. Уг нь 100 хувь мэдээлэл өгөх ёстой. Монголбанкнаас зээл өгсөн гэж байгаа. Нууцын зэрэглэлтэй байгаа учир би үнийн дүнг хэлж чадахгүй. Үүнийг ярихын тулд Монголбанкны Ерөнхийлөгч байсан Н.Золжаргалыг шалгах ёстой. Н.Золжаргалыг тухайн үеийн УИХ-ын дарга томилсон. Гэхдээ энд Ерөнхий прокурор, АТГ-ын дарга нарыг солих ёстой гэж яриад байгаа юм. Энд солих ёстой гээд яриад байгаа хүмүүс нь өөрсдөө асуудалтай юм байна лээ. ЖДҮ-ийн асуудлаар таван гишүүний эрхийг түдгэлзүүлэхээр орж ирэх ёстой юм билээ.

Уг нь энэ хүмүүсээр ажлыг нь хийлгүүлээд, 49 хувийн булхайг илрүүлж Монгол Улсдаа өмчөө авдгаараа авъя. Үнэхээр эд нар хийж чадахгүй гэвэл Ерөнхийлөгч Х.Баттулга хамааралгүй, ЖДҮ-чдэд хамааралгүй хөндлөнгийн хүнийг олж тавимаар байна.  Ингэхгүй бол 2016 оноос хойш гурван ч жил яриад шийдэж чадахгүй байна. Хурдан үүнийгээ шийдэх хэрэгтэй. Би ЗГХЭГ-ын дарга Л.Оюун-Эрдэнэд албан тоот өгөх гэж байгаа. “Стандарт” банктай холбоотой 188 хавтаст хэрэг, 50-60 мянган хуудас материал хуримтлагдаад байна. Олон улсын шүүхээс “Стандарт” банкны өрийг төлөх ёстой гээд заачихсан. Жилд гурван тэрбум төгрөгийн торгуульд орж байна. Энэ хооронд “Стандарт” банк Хятадад зарагдчихлаа. Хятадууд өнөөдрийг хүртэл шүүхийн шийдвэрийн хуудсаа ирүүлэхгүй байгаа нь нэг л учиртай.

Хэрэв шүүхийн шийдвэрийн хуудас ирвэл тоолуур нь зогсоно. Гэвч тоолуур нь өдөр болгон явж байна. Энэ тоолуурыг зогсоох хэрэгтэй. Ингэхийн тулд хэлэлцээрт зайлшгүй орох ёстой. Засгийн газраас хэлэлцээрт орох субъектээ тодорхойлох хэрэгтэй. Засгийн газар хэлэлцээрт орох уу, хувьцаа эзэмшигч нь эсвэл байгууллага нь орох уу гэдгээ шийдээд тоолуурыг зогсоож төлбөрийг багасгаж, хэн төлөхийг шийдэх хэрэгтэй. Тиймээс би хэлэлцээрийн субъектийг яаралтай гаргаж өгөөч гэдэг шаардлагыг ЗГХЭГ-ын дарга Л.Оюун-Эрдэнэд хүргүүлж байна. Хэлэлцээрт орох субъект нь хэн төлөх, тоолуур зогсоох, төлбөр зогсоох зэрэг асуудлыг шийдэх юм. Хятадуудын зүгээс 450 сая ам.доллар нь “Эрдэнэт”-ийн 49 хувь юм бол 500 орчим сая ам.доллар 51 хувь гэсэн ойлголттой байгаа.

Тэгэхээр үйлдвэрийн өрийг 150-160 сая ам.доллар гэж тооцвол хувьцаа хэлбэрээр авахаар шүүхдэх байдал үүснэ. Тэгэхээр “Эрдэнэт” үйлдвэрийн 10-20 хувь нь хятадуудад очих магадлалтай. “Стандарт” банк 109 сая ам.доллар нэхэмжилж, Арбитрын шүүхэд хандан гурван удаагийн шүүх хуралд ялалт байгуулаад байгаа. Арбитрын шүүхээс зээл, зардал, үндсэн зээлийн хүү, торгуульд нийт 99 сая ам.долларыг нэхэмжилсэн шийдвэр гаргасан. Гэтэл энэхүү мөнгө төлөгдөхгүй явсаар хүү, алдангитайгаа нийлэн 126 сая ам.доллар болоод байгаа юм. Тиймээс асуудлыг шийдэхгүй дахин нэг жил болох юм бол сард 1.2 сая ам.доллараар нэмэгдэж, 150-160 сая ам.доллар төлөх байдалд хүрч болзошгүй байна” гэлээ.

Р.Хишигжаргал