Салхитын мөнгөний ордыг эзэмшигч нартай холбоотой хэрэгт хамжигчаар оролцсон байж болзошгүй гэх үндэслэлээр нэр бүхий иргэдэд АТГ-аас цагдан хорьсон юм. Гэвч Цагдан хорих 461 дүгээр ангид шүүгч Л.Бямбаа амиа алдснаар нэр бүхий таван иргэнийг сулласан.

Тэгвэл уг хэрэгт оролцсон, хамаарал бүхий аж ахуйн нэгж, зуучлагч албан тушаалтнуудын зураглалд “Цагдаагийн ерөнхий газрын Төмөр зам дахь цагдаагийн газрын дарга Ч.Болдбаатар, Улсын Ерөнхий прокурын  орлогч Г.Эрдэнэбат, талийгаач шүүгч Л.Бямбаагийн хүү С.Төмөрбат, Улсын Дээд шүүхийн шүүгч Г.Алтанчимэг, Ц.Амарсайхан, Д.Золзаяа, Г.Цагаанцоож, Д.Цолмон, Дүүргийн Иргэний хэргийн анхан шатны шүүгч Т.Энхжаргал нарын нэрс дурдагдаад байна.

Эх сурвалжийн өгүүлснээр эрх бүхий байгууллагаас талийгаач шүүгч Л.Бямбаад таван жилийн турш гүйцэтгэх ажиллагаа явуулсан байна. Энэ хугацаанд Салхитын мөнгөний ордын хэрэгтэй холбоотой хөдлөшгүй нотлох баримт цуглуулсны үндсэн дээр  түүнийг ийн саатуулсан бололтой юм. Харамсалтай нь талийгаач байцаалт өгснөөс хойш гурван цагийн дараа амиа хорлосон гэх мэдээлэл цацагдсан. Тэгвэл Салхитын мөнгөний ордын жим 2018 оны аравдугаар сарын эхээр эрх бүхий албан тушаалтны гэрээс 1.3 сая ам.доллар илэрсэн гэх хэрэгтэй мөн нэг сэжимээр холбогдсон байна. Тухайн үед цагдаагийн хурандаа Ч.Болдбаатарын гэрээс дээрх мөнгийг хураасан гэдэг мэдээлэл цацагдсан боловч АТГ болон цагдаагаас уг мэдээллийг үгүйсгэж байсан юм.

Талийгаач шүүгч Л.Бямбааг таван жилийн хугацаанд тагнаж, чангасан гэдгээс үзвэл Салхитын мөнгөний ордтой холбоотой хээл хахуулийн хэрэгт үнэхээр холбоотой байсан бололтой юм. Харин үүнтэй нэр холбогдсон долоон шүүгчийн хувьд энэ хэрэгт ямар оролцоотой оролцсныг тодруулахаар хуулийнхан ажиллаж байгаа аж.

Г.Эрдэнэ