Засгийн газрын өнөөдрийн хуралдаанаас гарсан шийдвэрийг ЗГХЭГ-ын дарга Л.Оюун-Эрдэнэ танилцууллаа. 

Тэрбээр “Монгол Улсын Засгийн газрын хуралдаанаар Үндэсний аюулгүй байдлын зөвлөлийн 2019 оны тавдугаар сарын 5-ны 05 тоот бичгийг хэрэгжүүлэх зорилгоор Монгол Улсын Засгийн газарт эрх олгох тухай хуулийн 1, 2 дугаар зүйлийг үндэслэн Засгийн газраас Эрдэнэт үйлдвэрт зургаан сарын хугацаатайгаар онцгой байдал зарласан. Онцгой байдал гэдэг нь үйлдвэрийн үйл ажиллагаанд ямар нэгэн доголдол үзүүлнэ гэсэн үг биш. Тэнд байгаа санхүүгийн баримтыг шалгаж үзэх, шаардлагатай байгаа баримтуудыг цуглуулах, үйлдвэрийн хэвийн үйл ажиллагааг хангах байдлаар онцгой дэглэмийг зургаан сарын хугацаанд тогтооно. Хэрвээ шаардлагатай гэж үзвэл УИХ-д оруулж энэ талаар мэдээллийг танилцуулна” гэлээ.

Тэрбээр цааш нь ярихдаа “Монгол Улсын Ерөнхий сайдын даалгавраар Засгийн газрын тогтоолыг нэн даруй хэрэгжүүлэх ажлын хэсэг гарсан. Тиймээс энэ мэдээллийн дараа бид Эрдэнэт үйлдвэр рүү хөдөлнө” гэдгийг ч хэлж байв.

Мөн “Энэ бол Зүүн Азид түгээмэл ашиглагддаг мөнгө угаалтын түгээмэл систем. Дэлхийн 13 улсад ийм систем ажиглагддаг. Ялангуяа ардчилал хөгжсөн оронд түгээмэл ажиглагддаг жижиг луйврын асуудал. Тиймээс энд сүржигнээд байх зүйл байхгүй. Ер нь хууль хэрэгждэг улсад энэ байдал аль эрт шийдэгдсэн байх ёстой байдаг. Аливаа асуудлыг эцэслэн мухарлаж, зөв ойлголтыг өгөх нь Засгийн газрын үүрэг юм. Нөгөө талаар Засгийн газрын хуулиар бүрэн эрх нь гэмт хэрэгтэй тэмцэх байдаг. Тиймээс Засгийн газар өөрөөс шалтгаалах зүйлээ авч хэрэгжүүлж байна” гэлээ.

Үүнээс гадна Засгийн газрын өнөөдрийн хуралдаанаар шүүгч Мишиг овогтой Батсуурийг тус мөнгө угаах хэрэгт оролцож, албан тушаалаа урвуулан ашигласан байж болзошгүй хэмээн үзэж АТГ, ШЕЗ-д гомдол гаргах шийдвэр гарчээ.

ЗГХЭГ-ын дарга Л.Оюун-Эрдэнэ ярихдаа “Төрд мөнгө байсаар байтал бусдад давуу байдал олгож Монгол Улсын төр засаг, Эрдэнэтийн 49 хувьтай холбоотой худалдан авах ажиллагааг УИХ-аар хэлэлцүүлээгүй албан тушаалтнуудыг АТГ-т өгөх нь зүйтэй гэж үзлээ” хэмээн мэдэгдлээ.

Цагдаагийн ерөнхий газраас болон Тагнуулын ерөнхий газарт уг мөнгө угаах хэрэгтэй холбоотойгоор зарим хүнд таслан сэргийлэх ажил хийгдсэн гэдгийг ч хэлж байв. Тэрбээр прокурорт хандана. Уг байгууллага жил орчмын хугацаанд Цагдаагийн ерөнхий газрын үйл ажиллагааг тасалдуулсан гэж үзэж байгаа. ЭНэ асуудал цаашид шүүхэд очно. Тэгэхээр хэн гэдэг албан тушаалтан дээр очиж ямар байдлаар гацах вэ. Үнэхээр хууль хяналтын байгууллага өргөсөн тангарагтаа эх орны язгуур эрхт үнэнч байх нуу эсвэл томилсон бүлэгтээ үнэнч байх нуу гэдгийг Монголын ард түмэн нүд цавчилгүй харах үлдлээ.

Өчигдрийн үйл явдал болсны дараахан төрийн өндөр дээд албан тушаалд ажиллаж байсан нэр бүхий албан тушаалтан хууль хяналтын байгууллагууд руу утастаж дарамт үүсгэсэн нөхцөл байдал илэрч байна. Би өнөөдөр нэрийг нь хэлэхгүй. Мөн Эрдэнэтийн 49 хувийн худалдан авах асуудалтай холбоотой байгаа зарим нэр бүхий хүмүүс хууль хяналтын байгууллага руу утастаж уулзахыг хүссэн гэсэн мэдээлэл Тагнуулын ерөнхий газраас ирсэн. Ийм үйлдлийг таслан зогсоох ёстой. Гэхдээ цаашид ийм үйлдэл гарсаар байвал нэр устай нь зарлах ёстой” гэлээ.