Улсын Их Хурлын ээлжит бус чуулган товлон зарласантай холбогдуулан УИХ-ын Тамгын газрын Ерөнхий нарийн бичгийн дарга Ц.Цолмонгоос дараах тодруулгыг авлаа.

-УИХ-ын даргын дэргэдэх зөвлөл өчигдөр хуралдаж, УИХ-ын ээлжит бус чуулганыг хуралдуулахаар тогтсон. Ээлжит бус чуулганаар ямар асуудал хэлэлцэх юм бэ?

-УИХ-ын дарга захирамждаа ээлжит бус чуулганаар хэлэлцэх асуудлыг тодорхой зааж өгсөн. Тухайлбал, Татварын ерөнхий хуулийн шинэчилсэн найруулгын төсөл, Аж ахуйн нэгжийн орлогын албан татварын тухай хуулийн шинэчилсэн найруулгын төсөл, Хувь хүний орлогын албан татварын тухай хуулийн шинэчилсэн найруулгын төсөл, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн төслүүдийг хэлэлцэж эцэслэн шийдвэрлэнэ. Мөн Ашигт малтмалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн Ашигт малтмалын тухай хуульд нэмэлт, өөрчлөлт оруулах тухай хуульд өөрчлөлт оруулах тухай хуулийн төслийг хэлэлцэхээр төлөвлөсөн байгаа.

-Ерөнхийлөгч зарим албан тушаалтны томилгооны асуудал хэлэлцүүлэхээр санал болгосон байна лээ. Ээлжит бус чуулганаар томилгооны асуудлыг хэлэлцэх боломжтой юм уу?

-Томилгооны асуудлыг хэлэлцэнэ. Учир Ерөнхийлөгчөөс Зэвсэгт хүчний Жанжин штабын даргыг томилох саналыг зөвшилцөх, Улсын Ерөнхий прокурорын орлогчийг зөвшилцөх, АТГ-ын дарга, дэд даргыг томилох тухай асуудлыг УИХ-аар хэлэлцүүлэх албан бичгийг ирүүлсэн. Үүний дагуу УИХ-ын даргын захирамжид ээлжит бус чуулганаар энэ асуудлыг хэлэлцүүлэхээр тусгасан.

-Хаврын чуулганаас эхэлж гишүүд хурууны хээгээрээ ирцэд бүртгүүлж, саналаа өгдөг болно гэсэн. Хуулийн зохицуулалт хэрэгжиж эхлэнэ гэсэн үг үү?

-Яг тийм. Технологийн шийдлийг надад танилцуулсан. Тамгын газрын Мэдээллийн технологийн хэлтсийнхэн чуулганаас өмнө бэлтгэл ажлаа бүрэн хангахаар ажиллаж байгаа.

Р.Хишиг