УИХ-ын ээлжит бус чуулган энэ сарын 18-нд буюу ирэх даваа гарагт хуралдахаар товлогдсон. Чуулганаар хэлэлцэх асуудлын дараалал гарсан ч Ерөнхийлөгчийн зүгээс АТГ-ын дарга, дэд даргын томилгоог хийх сонирхолтой байгаагаа илэрхийлсэн бол АН-ын зүгээс ЖДҮ-чин гишүүдийн асуудлыг орхиж болохгүй ээлжит бус чуулганаар хэлэлцэх ёстой гэж үзсэн юм.

Үүнээс гадна ээлжит бус чуулганы үеэр Улсын ерөнхий прокурорын зүгээс нэр бүхий таван гишүүнийг яллагдагчаар татахаар оруулж ирнэ гэдгээ мэдэгдсэн нь олны анхаарлыг татаад байна. Энэ ч утгаараа дээрх таван гишүүн хэн бэ гэдэг асуудал тодорхойгүй байсан бол хэвлэлээр Х.Болорчулуун, Х.Нямбаатар, М.Оюунчимэг, Ж.Энхбаяр, Н.Оюундарь нарыг тодорч эхэллээ. 

Тэгвэл ээлжит бус чуулганаар ЖДҮ-чин гишүүдийн асуудлыг хэрхэн шийдвэрлэх эсэх нь тодорхойгүй байна. Учир нь өмнө нь Л.Энхболд, Г.Солтан, Д.Дамба-Очир, Б.Ундармаа нарын гишүүдийн бүрэн эрхийг түдгэлзүүлэхээр оруулж ирсэн ч Халдашгүй байдлын дэд хороо, Төрийн байгуулалтын байнгын хороо, чуулганаар түдгэлзүүлэх шаардлагагүй хэмээн үзсэн. Тэд тайлбараа ЖДҮ-гээс зээл авсан гишүүдийг цувруулж бус 23 гишүүнийг бөөнд нь оруулж ир гэсэн юм. Тиймээс дахин өөр таван гишүүний нэрийг цувуулж оруулж ирснээрээ Улсын Ерөнхий прокурор гишүүдийн уурыг барах вий дээ. Мөн Ж.Батзандан, Л.Болд нар бүлгийн харьяаллаас гараад зогсохгүй У.Хүрэлсүхийн хүн болсон. Тэдний санал уг таван гишүүнийг түтгэлзүүлэх эсэх асуудалд нөлөөлөх нь дамжиггүй юм. 

Р.Хишигжаргал