“Хөдөлмөрийн тухай хуулийн шинэчилсэн найруулгын төсөл"-ийн хэлэлцүүлэг эхэллээ. Хэлэлцүүлэгт уг төслийн ажлын хэсгийн дарга, Нийгмийн бодлого, боловсрол, соёл, шинжлэх ухааны байнгын хорооны гишүүн, УИХ-ын Ц.Мөнх-Оргил, Хөдөлмөр нийгмийн хамгааллын сайд С.Чинзориг болон Монголын үйлдвэрчний эвлэлийн холбоо, Ажил олгогчдын нэгдсэн холбоо, Хүний эрхийн комисс, Монголын худалдаа аж үйлдвэрлэлийн танхим, хуульч, эрдэмтдийн төлөөлөл оролцож байна.

Хөдөлмөрийн тухай хуулийн шинэчилсэн найруулгыг хаврын УИХ-ын чуулганаар танилцуулах бөгөөд хуулийн хамрах хүрээг өргөтгөх, хөдөлмөр эрхлэлтийн харилцааны шинж үүссэн үеэс тооцох, суурь хэм хэмжээг тогтоох, хөдөлмөрийн харилцаанд бартмтлах зарчим, ажил олгогч, ажилтны эрх, үүргийг нарийвчлан зохицуулж өгчээ.

Энэ талаар Хөдөлмөр нийгмийн хамгааллын сайд С.Чинзориг “2015 онд Иргэний хэргийн анхан шатны шүүхээр шийдвэрлэгдсэн хөдөлмөрийн маргааны дийлэнх буюу 90.3 хувийг ажлаас буруу шилжүүлсэн, үндэслэлгүй халсан, цалингийн маргаан эзэлсэн бөгөөд энэ тоо 2017 онд 92 хувь, 2015-2018 оны дунджаар 89.5 хувийг эзэлж байна.

Иймд Хөдөлмөрийн тухай хуулийн шинэчилсэн төсөлд цалин хөлсний нэмэгдлийг зохицуулж өгөх нь зайлшгүй шаардлагатайг харуулж байна. Тиймээс энэ хуулийн зарим заалтыг боловсронгуй болгох хэрэгтэй” гэлээ. Түүнчлэн долоо хоногийн ажлын цагийн дээд хэмжээг тогтоох, цалингийн нэмэгдлийг тодорхой болгох, хөдөлмөр эрхлэгчдийн эрх ашгийг хамгаалах зэрэг иргэдийн эрүүл мэндэд анхаарсан бодлого тусгах шаардлагатайг онцоллоо.

Хэлэлцүүлэг үргэлжилж байна.

Б.Лхам