УИХ-ын гишүүн, ХХААХҮ-ийн сайд Ч.Улаан энэ сарын 13-15-нд ОХУ-д айлчиллаа.
Айлчлалаар ОХУ-ын Хөдөө аж ахуйн сайд Д.Н.Патрушев болон Аж үйлдвэр, худалдааны орлогч сайд бөгөөд Төрийн нарийн бичгийн дарга В.Л.Евтухов нартай уулзаж хоёр орны худалдааг нэмэгдүүлэх, худалдааны тэнцвэртэй бус байдлыг арилгахад Хөдөө аж ахуйн бараа бүтээгдэхүүн, түүний дотор малын гаралтай түүхий эд тухайлбал, ноос, ноолуур, үхрийн шир зэрэг бүтээгдэхүүн гаргах замаар Монгол Улсаас ОХУ-д нийлүүлэх экспортыг нэмэгдүүлэхэд хамтран ажиллах бүрэн боломжтойг тэмдэглэв.
Мөн малын удмын санг хамгаалах талаар ОХУ-ын хүрээлэнгүүдтэй хамтран ажиллахаар тохиролцжээ.
ОХУ-ын Хөдөө аж ахуйн сайд Д.Н.Патрушевтэй уулзах үеэр хөдөө аж ахуйн салбарын хамтын ажиллагааны хүрээнд Монголын малыг эрүүлжүүлэх хөтөлбөрийн эхний хоёр үе шатыг амжилттай хэрэгжүүлж дууссан болохыг тэмдэглэж хөтөлбөрийн гуравдугаар шатыг хамтран хэрэгжүүлэх сонирхолтой байгаагаа талууд илэрхийлсэн байна. ХХААХҮ-ийн сайд Ч.Улаан Монгол Улсаас ОХУ-д мах, махан бүтээгдэхүүн нийлүүлэх хэмжээг нэмэгдүүлэх чиглэлээр хамтран ажиллахын зэрэгцээ Монгол, Оросын хил орчим хамтарсан махны үйлдвэр, хорио цээрийн бүс бүхий цогцолбор байгуулах саналыг дэвшүүлэв. ОХУ-ын Хөдөө аж ахуйн сайд Д.Н.Патрушев, хоёр талын нийт бараа эргэлтэд ХАА-н бараа бүтээгдэхүүний эзлэх хувь хэмжээ сүүлийн жилүүдэд тогтвортой нэмэгдэж байгааг онцлоод, уулзалтаар Монгол малын чанарыг сайжруулах зорилгоор ОХУ-аас цэвэр үүлдрийн мал нийлүүлэх, малын удмын санг хамгаалах зорилгоор тус улсын судалгаа, эрдэм шинжилгээний хүрээлэнтэй хамтын ажиллагааг өргөжүүлэх чиглэлээр ажиллахаар тохиролцсон аж.
ОХУ-ын Аж үйлдвэр, худалдааны орлогч сайд бөгөөд Төрийн нарийн бичгийн дарга В.Л.Евтуховтай уулзах үеэр ХХААХҮ-ийн сайд Ч.Улаан, энэ онд Монгол Улс атар газар эзэмшиж, газар тариалангийн салбар хөгжүүлсний 60 жилийн ой тохиож байгааг тэмдэглээд, “Манай ХАА-н салбарыг хөгжүүлэхэд оросын мэргэжилтнүүд, техник, тоног төхөөрөмж чухал хувь нэмэр оруулсан”-ыг онцолж, хоёр улсын ХАА, аж үйлдвэрийн салбарын хамтын ажиллагааны хүрээнд 2017 болон 2018 онд “Газар тариалангийн техникийн шинэчлэл” төслийг амжилттай хэрэгжүүлсэн туршлагад суурилан төслийг цаашид үргэлжлүүлэн хэрэгжүүлэх сонирхолтой байгаагаа тэмдэглэжээ.
