УИХ-ын дарга Г.Занданшатар тэргүүтэй нэр бүхий долоон гишүүн Швейцар Улсад албан ёсны айлчлал хийгээд өнгөрсөн баасан гарагт ирсэн. Айлчлалын үеэр гишүүд Сангийн сайд асан С.Баярцогтын оффшор дансны гүйлгээгий баримтыг авчирсан юм.
Уг асуудалтай холбогдуулан олон нийтийн зүгээс УИХ-ын гишүүд оффшор дансны баримтыг авчирсан нь зөв. Гэхдээ УИХ хянах үүрэгтэй болохоос бус мөрдөн шалгах үүрэггүй, хууль хяналтын байгууллагын урдуур орох нь зохисгүй хэмээн буруутгаж байгаа юм. Тиймээс уг асуудалд УИХ-ын гишүүд ямар байр суурьтай байгааг тодрууллаа. УИХ-ын дэд дарга Л.Энх-Амгалан "Хэвлэл мэдээллээр гарсан мэдээг харсан. Албаны мэдээлэлгүй байна. Бүлгийн хурлаар асууж тодруулна" гэсэн бол ЗГХЭГ-ын дарга Л.Оюун-Эрдэнэ "Өгч болдог юм бол түүнийг аваад задлахад юу нь болохгүй гэж. Гэхдээ үнэхээр ийм баримт авчирсан эсэхийг баримттай тайлбарлаж чадахгүй. Швейцарын банк ийм баримт өгсөн бол үүнийг нуух хэрэггүй. Оффшор буруу гэж бодож л байвал баримт авчирсан нь буруу биш" гэсэн юм.
Харин Гадаад харилцааны сайд Цогтбаатар "Эрх зүйн туслалцааны гэрээ гэж бий. Бид бусад оронтой харилцаа холбоотой байдаг. Консулын шугмаар иргэдтэй холбоотой аливаа мэдээллийг өгөх юм бол хууль хяналтын байгууллагад албан ёсоор дамжуулж өгдөг. Эрх зүйн туслалцааны гэрээтэй орны прокурор, хууль хяналтын байгууллагууд шууд харилцах боломжтой" гэлээ.
Р.Хишигжаргал
Сэтгэгдэл (37)