УИХ-ын гишүүн Ж.Батзандан, Л.Болд нар “Монголыг хамгаалах шинэ улс төрийн хүчин” нам нээж байгаа тухайгаа албан ёсоор мэдэгдлээ.

Энэ талаар УИХ-ын гишүүн Л.Болд “Миний бие өнгөрөгч оны 2018 оны арванхоёрдугаар сарын 3-ны өдөр АН-ын бүлгээс, 4-ний өдөр нь АН-аас гарсан. Учир нь АН гишүүдийг хөөдөг нам болж хувирлаа. Ингэж  яавч таарахгүй. Үүнийг эсэргүүцэж, АН-ын удирдлагуудад сануулга өгсөн юм. АН-ын удирдлагууд чуулган дуусталх хугацаанд хариуцлага хүлээж, хууль бус шийдвэрээсээ татгалзаагүй. Уг нь татгалзах байх гэж  бодсон юм. Чуулган хаахын өмнө буюу нэгдүгээр сарын 17-ны өдөр УИХ-ын чуулганы танхимд Ж.Батзандан гишүүнийг АН-ын бүлгээс гарч байгааг уншиж танилцуулснаар АН найм биш долоон гишүүнтэй болж, албан ёсоор бүлэггүй болсон. Ингээд чуулган хаагдсан. Энэ хугацаанд Л.Болд гишүүн бид хоёр бүлэггүй болсон учраас сонгогчидтойгоо уулзаж, тайлангаа тавьсан. Сонгогчдын зүгээс бидний улс төрийн дараагийн үйл ажиллагааг үргэлжлүүлэн дэмжихээ илэрхийлсэн. Тиймээс УИХ-д суудалтай шинэ нам байгуулснаа зарлаж байна” гэв.

Түүнчлэн С.Зориг агсны амь насыг хөнөөсөн хэргийг энэ долоо хоногт задална. Энэ хэргийн мөрдөн шалгах ажиллагаа хууль бус явагдсаныг хоёр жилийн хугацаанд хэлж, ярилаа. Гэтэл хүмүүс эргэлзэж, итгэхийг хүсээгүй. Мөн С.Баярцогт, С.Баяр нарын оффшорыг таван жилийн өмнө задалахад Ж.Батзандан худлаа ярьж байна гэж олон хүн гайхаж байлаа. Өнөөдөр Б.Хурцтай холбоотой олон асуудал сөхөгдөж, түүний цол хэргэмийг хураах тухай асуудал яригдаж байна гэсэн юм.

Мөн УИХ-ын дарга Г.Занданшатар тэргүүтэй нэр бүхий долоон гишүүн Швейцарь Улсад албан ёсны айлчлал хийх үеэрээ Сангийн сайд асан С.Баярцогтын оффшор таван дансны баримтыг авчирсан тухайгаа мэдэгдсэн билээ. Тэгвэл энэ талаар тус ажлын хэсэгт багтсан УИХ-ын Л.Болд “Энэ оны эхний хагас жилд багтан Швейцарийн парламентын дарга манай улсад айлчилна. Швейцарь Улс дэлхийд мөнгөө нуудаг, татвараас зугтдаг, гэмт хэргийг нуун далдалдаг байсан нэрнээсээ салж байна. Энд гэмт хэрэгтнүүд орогнодог газар биш гэдгийг Монгол Улсад өндөр хэмжээний айлчлал зохион байгуулснаараа ойлгомжтой мэдээллийг өгөх болов уу. УИХ-ын гишүүд мөрдөн шалгах ажиллагаа хийж, мэдээлэл дамжуулдаг мэтээр гуйвуулж ярьж байна. Тийм зүйл байхгүй. Айлчлалын үеэр Швейцарь Улс Монголоос дахин авлигачин, хулгайчдын мөнгийг авахгүй. Одоо байгаа мэдээллийг ямар нэгэн саадгүй ав гэсэн. Дипломат шуудангаар зарим нэг мэдээллийг явуулсан. Энд би оролцоогүй” хэмээн тайлбарлалаа.

Б.Цэрэнлхам