УИХ-ын гишүүн Т.Аюурсайхан мэдээлэл хийлээ. Тэрбээр “УИХ-ын дарга Г.Занданшатар болон бусад албаны хүмүүс Швейцарийн холбооны улсад албан ёсны айлчлал хийсэн.
Би айлчлалын бүрэлдэхүүнд багтсан гишүүний хувьд, УИХ дахь оффшорын эсрэг бүлгийн даргын хувьд олон нийтэд тодорхой мэдээлэл өгсөн. Гэвч миний өгсөн мэдээллийг үгүйсгэсэн, мушгин гуйвуулсан мэдээлэл гарч байна. Энэ мэдээллийн талаар тодорхой ойлголтгүй, үүрэг оролцоогүй, хийсэн ажилгүй хүмүүсийн худал мэдээллээс үүдэж ташаа мэдээлэл гарах болсон учраас энэ мэдээллийг хийж байна” гэсэн юм.
Тэрбээр үргэлжлүүлэн “УИХ-ын даргын хийсэн айлчалын бүрэлдэхүүн өнгөрсөн баасан гарагт Монголд буцаж ирсэн. Швейцарийн талаас Монголын талд С.Баярцогтын “Credit Suisse AG” банк дахь ам.долларын гурав, еврогийн хоёр, нийт таван дансны 2008.09.30-2013.12.31 хугацааны гүйлгээний дэлгэрэнгүй хуулгыг хүлээлгэж өгснийг айлчлалын баг авч ирсэн. Энэ мэдээлэл холбогдох журмын дагуу Гадаад харилцааны яамаар дамжиж, АТГ-т хүргэгдэж байгаа. Миний өнөөдрийн авсан мэдээллээр уг баримт АТГ-т хараахан очоогүй байна. Тиймээс энэ ажлыг түргэвчлүүлнэ. Чухал ач холбогдолтой мэдээлэл дарагдахаас сэргийлэх үүднээс мэдээлэл хийсэн.
УИХ-ын даргын айлчлалын бүрэлдэхүүнд орох саналыг би өөрөө тавьж байж орсон. Би хоёр зорилгоо хэлсэн. Нэгдүгээрт, Нийтийн албанд нийтийн болон хувийн ашиг сонирхолыг зохицуулах ашиг сонирхолын бүлгээс урьдчилан сэргийлэх хуулийн өөрчлөлтийг 2017 оны дөрөвдүгээр сард баталсан. Үүний дагуу Засгийн газраас оффшор бүс нутгийн жагсаалтыг баталсан. Энэ жагсаалтад тус улсын нэр байгаа учраас Швейцарийн холбооны улсаас асуулт тавьж байсан. Энэ асуудлыг дэвшүүлэхдээ буруу, зөрүү ойлголттой гарсан учраас миний зүгээс биечлэн очиж, ойлголтын зөрүүг гаргах хуулийн хэрэгжилтийг үргэлжлүүлж хангах боломж гаргах зорилготой байсан.
Хоёрдугаарт, иргэн С.Баярцогтын оффшор данстай холбоотой асуудлаар холбогдох албаны хүмүүстэй уулзах зорилгоор айлчлалын багт орох хүсэлтээ илэрхийлсэн. УИХ-ын дарга энэ асуудлыг ойлгож дэмжснээр айлчлалын бүрэлдэхүүнд оруулсан. С.Баярцогтын таван оффшор дансны хуулгийг авчирсныг айлчлалын бүрэлдэхүүнд явсан УИХ-ын гишүүд мэдээгүй. Харин УИХ-ын дарга мэдэж байсан” гэв.
Р.Хишигжаргал
Сэтгэгдэл (33)