УИХ-ын өнөөдрийн ээлжит бус нэгдсэн чуулганаар Засгийн газраас 2018 оны тав дугаар сарын 11-нд, УИХ-ын гишүүн Л.Элдэв-Очир нарын гурван гишүүн мөн оны зургадугаар сарын 8-ын өдөр тус тус өргөн мэдүүлсэн Төрийн болон орон нутгийн өмчийн хөрөнгөөр бараа ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн төслийг хэлэлцэж байна.

Хуралдаанд нийт 56 гишүүн ирсэн байгаа бөгөөд энэ үеэр УИХ-ын гишүүн Ж.Ганбаатар “Хэлэлцэх асуудлын мэдээллийг ядаж өмнөх өдөр нь өгч баймаар байна гэдэг О.Баасанхүүгийн саналтай нэг байна. Манай байнгын хороогоор ороогүй. Уг нь ийм хуулийн төслийг эдийн засгийн байнгын хороогоор хэлэлцүүлж байх хэрэгтэй. Би хуулийн төсөл санаачлагчаас нэмэлт өөрчлөлт оруулах болсон шаардлага нь яг юу юм бэ гэдгийг тодруулмаар байна. Яагаад тендерт шинэ байгуулагдсан компаниуд ялдаг юм бэ. Тендерт оролцож байгаа компани ЖДҮ бол 10 хувиар өсгөнө гэснийг 15 болгосон энэ хуульд яаж орсон бэ. Нийт тендерийн 10 хувийг ЖДҮ-д өгнө гэсэн хууль бий. Энэ заалттай яаж уялдаж байна вэ” гэхэд Сангийн сайд Ч.Хүрэлбаатар “УИХ-ын гишүүн Л.Элдэв-Очир, Ш.Раднаасэд, Б.Энх-Амгалан нар энэ хуулийг санаачилж, үндэсний үйлдвэрийг дэмжих чиглэлээр ажилласан. Энэ үед Засгийн газар дэмжих ёстой юм байна гэсэн байр суурьтай байсан тул хоёр хуулийн төслийг нэгтгэн хамтатгаад Засгийн газраас өргөн барьсан. Үндэсний үйлдвэрийг хэрхэн дэмжих вэ гэдэг хамгийн нэгдүгээр шалтгаан. Хуулийн төслөөр тендерийг гуравдагч этгээдэд шилжүүлэхийг бүрмөсөн хорьсон. Хамгийн бага үнийн санал, техникийн шаардлагыг нэгтгэсэн нь чанаргүй, стандартын бус зүйл хийх боломжгүй болно” гэлээ.

УИХ-ын гишүүн Ж.Ганбаатар “Миний асуултад хариулахгүй байна. Засгийн газраас оруулж ирж байгаа хуулиуд бусад хуультай уялдах нь маш бага байна. Энэ хууль чинь ЖДҮ-ийн хуультай уялдаагүй байна. Дунд сууж байгаа залуу өөрийнхөө хуулийг л яриад байна. Хоёр тодорхой асуулт асуулаа, алинд нь ч хариулсангүй. Засгийн газар хүч түрээд бусад хуультай уялдуулахгүй байна. Эцсийн хэлэлцүүлэгтээ орчихсон ЖДҮ-ийн хуультай уялдахгүй байна. Дараагийн удаад анхаараарай”

Ажлын хэсгийн гишүүн Сангийн яамны хууль, эрх зүйн дарга З.Энхболд “Үндэслэлгүй гомдол гаргаж байгаа ААН-ийн бүртгэлийг явуулж байна. Мөн чанаргүй ажил, үйлчилгээ үзүүлсэн компаниудыг жагсаалтыг ч гаргаж байна. Мөн хугацааг богиносгох сонголт байна. Үндэсний үйлдвэр болон импортыг холихгүй учраас үндэсний үйлдвэрийг 30-аас доошгүй хувь гэсэн зохицуулалт хийх шаардлагагүй гэж бодож байна”

Харин УИХ-ын гишүүн Б.Бат-Эрдэнэ “Тендерийг төрийн дээд шатанд ажиллаж байгаа хүмүүс, гишүүд өөрийн хамаарал бүхий компаниараа авч хийдэг зүйл бий. Энэ хуулийг өөрчлөөд өөрчлөөд өөдөлдөггүй. Жишээлбэл, би нэг зовлон тоочъё. Хэнтий аймгийн Дэлгэрхаан суманд 320 хүүхдийн сургууль бариулах гэтэл эрх мэдэл бүхий эрхэм тендерийг нь аваад, зураг төсвийг нь өөрчлөөд барьчихсан. Гэтэл одоо дахиад спортын заал барих гээд нэг тэрбум төгрөг төсөвлөөд сууж байна. Арга, баширтай улс үгсэж хуйвалдаад, хамаарал бүхий компанидаа гэрээ хийж байна. Дарга нар өөрийн компаниараа тендер аваад бүгдийг залгиад сууж байх нь зөв үү”

УИХ-ын гишүүн, тус хуулийн ажлын хэсгийн ахлагч Д.Оюунхорол “Энэ хуулиар тендерийг ил тод, цахимаар сонгон шалгаруулдаг байхаар ажлын хэсэг дээр ярьсан. Тендерт шалгарсан компанид тавих захиалагчийн хяналт сул байна. Сургууль, цэцэрлэгийн барилгыг спорт заалгүй, жорлонгүй барьж байна. Тиймээс барилгын үйл ажиллагааны зарчим, хөгжлийн бэрхшээлтэй иргэдэд зориулсан шаардлагыг хангах ёстой Энэ мэтчилэнгээс болоод улсын төсвийн хөрөнгө оруулалт үргүй, чанаргүй, жилийн дараа ашиглалтад орж байна. Тиймээс чанаргүй барилга барьдаг компаниудын хар жагсаалтыг гаргана” гэлээ.

УИХ-ын ээлжит бус  нэгдсэн чуулган үргэлжилж байна.

Р.Хишигжаргал