УИХ-ын гишүүн Ж.Энхбаярын хамаарал бүхий компани Тариалан эрхлэлтийг дэмжих сангаас зээл авсантай холбогдуулан дараахь зүйлийг тодрууллаа.

-Таныг ТЭДС-аас зээл авч, зээлээ бүрэн төлсөн гэсэн мэдээлэл байна?

-Мэдээлэл зөв байна. Ж.Энхбаяртай холбоотой ямар нэгэн зээл байхгүй. Бүрэн төлж дууссан. Ажлын байр бий болгох үүднээс Хөдөө аж ахуйн яамнаас зарласан тендерт миний хөрөнгө орлогын мэдүүлэгт тусгагдсан аж ахуй нэгж шалгарсан. Ингээд хөдөө аж ахуйн төсөл хөтөлбөрөө хэрэгжүүлж, холбогдох зээлээ бүрэн барагдуулсан.

-Боловсорлын сангаас мөн зээл авсан. Одоогоор зээлээ төлөөгүй гэсэн мэдээлэл байна?

-16 жилийн өмнөх үйл явдал. Та нар шиг залуу байсан үе. Энд нэг зүйл Боловсролын зээлийн сан 60 хувьтай ашиглагддаг. Харин үлдсэн 40 хувь ашиглагдахгүй байна. Учир нь Монгол Улсын үе үеийн төр тэр дундаа ХХ зуунд манай улс олон зуун залуучуудаа зээлийн хөрөнгөөр ОХУ болон Зүүн европын улсуудад сургаж байсан. Энэ нь улс орондоо том бүтээн байгуулалтыг бий болгосон, боловсон хүчнээ бэлтгэсэн бодлого байсан. 1990 оноос хойш тэр бололцоо санхүүгийн хувьд хязгаарлагдсан ч тасралтгүй дээд боловсролыг дэмжих зээлийн санг ажиллуулж байсан. Гадаадын их дээд сургуульд бакалавр, магистрт суралцах нөхцлийг хангасан залуучуудад санхүүгийн дэмжлэг үзүүлж ирсэн. Гэхдээ үүнийг тодорхой гэрээ, үүргийн дагуу олгодог. Би тэр хөтөлбөрт нь хамрагдаж мастерын цол хамгаалсан. Гэрээнд заасан үүргийн дагуу үүргээ бүрэн биелүүлсэн.

-Таныг 6000 ам.доллароо төлөөгүй гэсэн мэдээлэл байсан?

-Сангийн яаманд хичнээн хүн зээлийн санд хамрагдсан талаарх мэдээлэл бий. Тэндээс лавлах хэрэгтэй. Мөн гэрээтэй холбоотой үүргээ Ж.Энхбаяр гэдэг хүн биелүүлсэн үү гээд асуу. Үүргээ бүрэн биелүүлсэн гэдэг мэдээлэл тэнд бий.

-Таныг прокуророос бичиг ирэхээс өмнө сайн дураараа бүрэн эрхээсээ татгалзаж шалгуулна гэсэн мэдээлэл байна. Энэ үнэн үү?

-Ж.Энхбаярыг тусгаарлаж шалгах хэрэгтэй гэвэл бэлэн гэдгээ хэлсэн. Учир нь би итгэлтэй байгаа. Энэ бол салбар яамны салбар төсөл. Манайх ил тод нээлттэй шалгаруулалтад оролцож барьцаа хөрөнгөө тавьж авсан зээл. Ялсан төсөл нь амжилттай хэрэгжсэн. Ийм л зүйл. Энд Ж.Энхбаяр хууль зөрчиж, хулгай хийж аргалсан юм байхгүй. Хөдөө аж ахуйн салбарын төслийг дэмжихгүй юм бол Хөдөө аж ахуйн яам өөр ямар төсөл дэмжих юм бэ. Тиймээс би энд итгэлтэй байгаа.

-Тэгэхээр таны хамаарал бүхий компанхи ЖДҮ-гээс зээл авах шалгуурыг хангасан гэсэн үг үү?

-Хангахаар барах уу. Шаардлага хангасан болоод л зээл авч байгаа шүү дээ. Шаардлага хангаагүй бол өөр асуудал. Тиймээс би шалгуулахдаа итгэлтэй байна. Шалгуулахад бэлэн байна. Хуулийн байгууллагын ажлыг нь хийлгэх хэрэгтэй. Хуулийн байгууллага хараат бусаар ажлаа хийж, шалгах ёстой зүйлээ шалгаад дуусч байгаа байх. Энд туйлшрах зүйл байхгүй.

Р.Хишигжаргал