УИХ-ын ээлжит бус нэгдсэн чуулган үргэлжилж байна. Хуралдаанаар Засгийн газраас 2018 оны арваннэгдүгээр сарын 21-ны өдөр өргөн мэдүүлсэн Ашигт малтмалын тухай хуульд өөрчлөлт оруулах тухай хуулийн төслийг хэлэлцэж байна.

УИХ-ын гишүүн А.Ундраа “Ашигт малтмалын тухай хуульд өөрчлөлт оруулах хуулийн төслийг хэлэлцээд хойшлогдсон. Одоо дахин хэлэлцэж байна. Энэ хугацаанд нөхцөл байдал өөрчлөгдсөн. Салбарын сайд он гарсаар Монголбанканд тушаасан алтны хэмжээг өмнөх оны мөн үетэй харьцуулахад хэр хэмжээгээр буурсан. Энэ нь эдийн засагт ямар сөрөг нөлөө үзүүлэх эрсдэл үүсээд байгааг танилцуулсан. Эндээс алт тушаалтын хэмжээ эрс буурсан нь ойлгомжтой байна. Харин ямар шалтгааны улмаас буурч байгааг Монголбанкнаас тодруулмаар байна. Мөн алт олборлолтын горимд хариуцлагатай хандах хэрэгтэйг Заамарт болсон осол харуулж байна. Алт тушаалтыг ямар эх үүсвэрээс яаж авсан бэ. Хууль бусаар хилээр давуулж байгаа асуудалтай тэмцэхийн тулд хууль хяналтын байгууллагатай яаж хамтарч ажиллаж байгаа вэ гэдгийг салбарын сайдаас тодруулмаар байна” гэв.

Монголбанкны дэд ерөнхийлөгч Б. Лхагвасүрэн “Монгол Улс 2017 онд 20 тонн, 2018 онд 22 тонн алт олборлосон. Эндээс харахаар үйлдвэрлэлт, олборлолт хэвийн явагдаж байгаа гэж харахаар байна. Монголбанкны зүгээс энэ оны хоёрдугаар сарын байдлаар 336 кг алт худалдаж авсан. Өмнөх оны мөн үед 1.7 тонн алт худалдаж авсан байсан. Эндээс ашигт малтмалын нөөц ашигласан татвартай холбоотойгоор Монголбанканд алт худалдах нь багассан гэж бид дүгнэж байгаа. Өмнө нь 2.5 хувийн татвар төлдөг байхдаа 1.7 тонн алт худалддаг байсан бол татварын хэмжээ нэмэгдсэнээр багассан. Үйлдвэрлэлт олборлолт хэвийн явагдаж байгаа гэж дүгнэж байгаа” гэсэн юм.

Харин УУХҮ-ийн сайд Д.Сумъяабазар “Яамны зүгээс хууль хяналтын байгууллагатай ажлын хэсэг байгуулж, хууль бусаар алт олборлодог процест шалгалт хийсэн. Дотоодоос мэдээлэл задарсан. Шалгахаар очих үед бүх техник тоног төхөөрөмж, компютерээ салгаад алга болсон тохиолдол цөөнгүй гарсан. Тиймээс өндөржүүлсэн хэмжээнд зохион байгуулж, хууль бус алт олборлогч иргэн, аж ахуйн нэгжийн үйл ажиллагааг таслан зогсооно. Үүнд МХЕГ, Хуульзүй, дотоод хэргийн яам, Цагдаагийн ерөнхий газартай хамтарч ажиллахаар зэхэж байна. Нүүрсний дор, машины эд ангид нуусан алтыг илрүүлэхэд хүндрэлтэй байдаг. Тиймээс хараа хяналтаа сайжруулах ажлыг Сангийн яам, Хуульзүй, дотоод хэргийн яам, МХЕГ, УУХҮЯ хамтарсан байдлаар сайн зохион байгуулж ажиллах ёстой” гэлээ.

Р.Хишигжаргал