Ерөнхийлөгч Х.Баттулга зарлиг гаргаж Зэвсэгт хүчний Жанжин штабын даргаар ажиллаж байсан дэслэгч генерал Д.Давааг үүрэгт ажлаас нь чөлөөлснөөс хойш дөрвөн сарын хугацаа өнгөрчээ. Энэ хугацаанд Монгол Улсын зэвсэгт хүчин албан ёсны удирдлагагүй, үүрэг гүйцэтгэгчтэйгээр өнөөдрийг хүрсэн гэсэн үг. Хэдийгээр хошууч генерал А.Ганбатыг энэ албанд томилуулахаар зөвшилцөх бичгийг Ерөнхийлөгчийн зүгээс УИХ-ын дарга Г.Занданшатарт хүргүүлсэн ч намрын ээлжит чуулган хаалтаа хийсэн билээ.
Харин ээлжит бусаар хуралдаж эхэлсэн чуулганы энэ өдрүүдийн гол асуудлын нэг нь генерал А.Ганбатыг Жанжин штабын даргаар томилох эсэх байх нь. Эндээс А.Ганбат гэж хэн болох, түүнийг яагаад нэр дэвшүүлэх болсон бэ гэсэн асуулт гарч байна.
Төгссөн сургууль, эзэмшсэн мэргэжлийн тухайд генерал А.Ганбат салбартаа шинэ хүн биш. Жанжин штаб, Батлан хамгаалах яаманд мэргэжилтнээс хэлтсийн, тэргүүн дэд дарга хүртэл албыг хашсан хүнийхээ хувьд салбараа арван хуруу шигээ мэддэг байж таарна.
Гагцхүү 2005 онд Ерөнхийлөгч асан Н.Багабандиас алтан мөрдэс зүүж, 2010 онд чөлөөлөгдсөн А.Ганбатыг албанд нь буцаан дуудах, бүр Жанжин штабын даргад нэрийг нь дэвшүүлэх болсон шалтгаан юу байв гэдэг нь сонирхолтой байгаа юм.
Нэгдүгээрт, тэрбээр Ерөнхийлөгч Х.Баттулгын мөрийн хөтөлбөрт тусгасан цэргүүдээр төмөр зам бариулах ажлыг гардан зохион байгуулах магадлал нь өндөр. Энэ тухайгаа генерал А.Ганбат “Цензургүй яриа” нэвтрүүлэгт орох үеэрээ тодорхой дурдсан байдаг юм. Тэрбээр “Цэргүүдийг бүтээн байгуулалтад оролцуулна гэдэг бол албадан хөдөлмөр эрхлүүлж байгаа хэрэг биш. Албадан хөдөлмөр эрхлүүлэх гэдэг бол цалин өгөхгүйгээр шууд үүнийг хий гэж тушаахыг хэлнэ. Монголд байгаа төмөр замыг ЗХУ-ын цэргүүд тавьсан юм. Одоо Тавантолгойн төмөр замыг БНХАУ тавина гээд байгаа. Цэргүүд нь л тавина шүү дээ. Тиймээс цэргүүдийг бүтээн байгуулалтад оролцуулна гэдгийг дэмжих хэрэгтэй” хэмээн ярьсан удаатай.
Тэгэхээр зэвсэгт хүчнийг бүтээн байгуулалтын ажилд татан оруулах, цэргүүдээр төмөр зам бариулах Төрийн тэргүүний сонирхол А.Ганбат генералыг томилсон тохиолдолд илүү тодорч мэднэ.
Хоёрдугаарт, А.Ганбат бол “Монголын Алт” буюу “МАК”-тай салшгүй холбоотой нэгэн. “МАК”-ийн Бодлогын зөвлөлийн дарга Б.Нямтайширтай үеэл. Өнгөрснөөс өнөөдрийг хүртэл хугацаанд Монголын улс төрд, Төрийн ордонд өрнөсөн гол сэдэв нь “Газрын доорх баялаг ард түмний өмч” хэмээх Үндсэн хуулийн заалт байв. Ерөнхийлөгч, УИХ-ын дарга, Ерөнхий сайд нарын зүгээс ч хууль бусаар эзэмшиж байгаа ордуудыг төрд буцааж авна гэдгийг онцолж эхэлсэн. Хамгийн сүүлд Ерөнхийлөгчийн Тамгын газрын дарга З.Энхболд хэвлэлд өгсөн ярилцлагадаа “400 орд нэг нэг эзэнтэй гэж үзвэл 400 хүний уурыг хүргэчих гээд байна” хэмээн ярьжээ. Түүнийхээр тэдгээр 400 ордоос хэдийг нь төрд буцаан авах эсэх нь цаг хугацааны асуудал болох хэрэг. Өнөөдөр Монголд ямар компани хамгийн олон тусгай зөвшөөрөл эзэмшдэг нь хэн бүхний өмнө ил болсон зүйл.
УИХ-ын чуулганы индэрээс Ерөнхийлөгч Х.Баттулгын сонгуулийн тугаа болгосон “30 гэр бүл”-ийг Тамгын газрынх нь дарга З.Энхболдоос эхлээд Ерөнхий сайд У.Хүрэлсүх хүртэл нэр цохож ярьсан удаатай.
Парламентад “МАК”-ийг төлөөлж суудаг нэгхэн гишүүн бий, тэр нь Н.Номтойбаяр. Хэлэлцэж байгаа асуудал болон Цагаан суваргын ордтой холбогдуулж хамгийн их шүүмжлэлд өртдөг, сөрөг дайралтуудыг сөрдөг нь мөн л тэр.
Гэтэл “МАК”-тай салшгүй холбоотой, холбогддог генералыг юуны учир Жанжин штабын дарга болгож дэвшүүлэх болов гэдэг нь сонирхолтой биш гэж үү. Эсвэл Ерөнхийлөгч Х.Баттулга, Тамгын газрын дарга З.Энхболд нар наагуураа шүүмжлэлтэй хандаж буй ч цаагуураа “МАК”-тай тохироо хийсэн байж таарах нь.
С.Сүлд
Сэтгэгдэл (33)