МАХН-ын дарга Н.Энхбаяр болон бусад холбогдох хүмүүс Эрдэнэтийн 49 хувийн луйврын асуудлын талаар мэдээлэл хийлээ.
Энэ талаар Ерөнхийлөгч асан Н.Энхбаяр “Эрдэнэтийн 49 хувьд луйвар орсон гэдгийг тухайн үед Шадар сайдаар ажиллаж байсан Ц.Оюунбаатар, Барилга, хот байгуулалтын сайдаар ажиллаж байсан З.Баянсэлэнгэ нар хэвлэлийн бага хурлын үеэр хэлж байсан. Гэтэл Ерөнхий сайд асан Ч.Сайханбилэг Эрдэнэтийн 49 хувьд луйвар болоогүй. Эрдэнэтийг Монголдоо авчирлаагэж тайлбарласан. Гэтэл үнэнд гүйцэгдэж, гадаадын оффшор бүсэд бүртгэлтэй компани луйвардчихсан гэдэг нь ил боллоо. Ингэхдээ төрийн мөнгийг луйврын аргаар авч төрийн өмчийг өөрийнх нь мөнгөөр авчихсан. Үүнийг тухайн үед З.Баянсэлэнгэ, Ц.Оюунбаатар нар дэлгэсэн. Гэвч үнэнийг задруулсанд өширхөж Ч.Сайханчилэг нарын гарын үсэгтэй тогтоолоор хуулийн байгууллага З.Баянсэлэнгийг буруутгасан юм. Ер нь үнэнийг хэлсэн хүнийг шоронд хийж, ял өгч, айлган сүрдүүлж, эрхийг нь хаадаг тогтолцоо шударга бусын хонгилын гол шинж болчихоод байна.
Эрдэнэтийн 49 хувийн асуудал бол М.Энхболдтой холбоотой нь үнэн. Намайг Ерөнхийлөгчөөр томилогдон ажиллаж байхад миний өрөөнд орж ирээд Эрдэнэтийн 49 хувийн хувьцааг Д.Эрдэнэбилэг авах гэж байна. Та хувьцаа авах уу гэж хэлээд загнуулж байсан хүн. М.Энхболд бол “сахал” Д.Эрдэнэбилэгт Худалдаа хөгжлийн банкийг хөөцөлдсөөр байгаад авч өгсөн хүн нь байхгүй юу. Ерөнхий сайдаар томилогдон ажиллаж байхдаа АНУ-ын Ерөнхий ассемблейд оролцоно гэж явчихаад “Жеррард металз” компанийнхантай уулзаж, уг ажлын талаар хэлэлцсэн байдаг. Үүнийг нь хэлэхээр гүжирдлээ гээд дуугангуут нь маргааш нь надаас цагдаагаас мэдүүлэг авна гэж байна.
Эхлээд ЖДҮ-чин гишүүдийнхээ халдашгүй бүрэн эрхийг нь түр хугацаагаар түдгэлзүүлээд байцаалт авчих. Дараа нь надаас байцаалт ав гэж би хэлмээр байна. Эрдэнэтийн 49 хувийг луйвар булхайгаар авсан юм чинь улсад буцааж аваад ард түмэнд хувьцаа болгож тараах хэрэгтэй. Энд ногдож байгаа 50 гаруй сая ам.долларын ашгийг ядарсан ард түмэндээ өг.
Мөн Д.Эрдэнэбилэгийн хэлсэнчлэн дэлхийн альт усад хаана хүүгүй, хугацаагүй, баталгаагүй зээл өгдөг юм бэ. Түүнийг нь олъё. Үүний цаана Эрдэнэтийн 51 хувийн хувьцаанд санаархсан луйвар явахыг үгүйсгэхгүй. Эрдэнэтийн 51 хувийг цагдаагийн байгууллагаас яагаад шалгахгүй байна вэ. Үүнийг тухайн үед С.Баярын захиалгаар хийсэн байж магадгүй гэж хардаж байна. 51 хувийг барьцаанд тавьснаас болж, 100 гаруй сая ам.долларын өрөнд уналаа гэж ярьсны төлөө цагдаа намайг дуудах ёсгүй.
Улсын Ерөнхий прокурорын газрын прокурор асан Е.Сагсайн тухай миний ярьсан бүхэн үнэн. Хүмүүсийн хувь заяагаар тоглож, намайг “Сагсайдаж” ялсан хүн. Тэр хүний бичлэг байгаа. Би өөрөө үзээгүй ч маш олон эх сурвалжаас сонссон” гэв.
Харин МАХН-ын дэд дарга Э.Эрдэнэжамъян “Н.Энхбаяр даргын ярих эрхийг нь хааж байгаа явдлыг Хэнтийн нөхөн сонгуультай холбоотой гэж харж байна. МАХН-ын сонгууль өгөх эрхийг дахин хасъя гэж байгаа хэрэг” гэдгийг онцолсон юм.
Б.Лхам
Сэтгэгдэл (32)