УИХ дахь МАН-ын бүлгийн өнөөдрийн хуралдаанаар С.Зоригийн хөнөөсөн хэргийг яаралтай хэлэлцэх хэрэгтэй хэмээн үзжээ. Иймд Улсын Ерөнхий прокурорын орлогч прокурор, АТГ-ын дарга, дэд даргын томилгоог мөн хойшлуулсан байна.

Тодруулбал, энэ талаар МАН-ын бүлгийн дарга Д.Тогтохсүрэн “Хуулиараа Ерөнхий прокурорын орлогчийн бүрэн эрхийн хугацаа дууссан учир дараагийн орлогч прокурорыг УИХ-тай зөвшилцөх журамтай. Хэдийгээр зөвшилцих зохицуулалтай ч УИХ-ын гишүүдийн олонхын саналаар шийдвэрлэдэг.

Тиймээс МАН энэ асуудлаар өнөөдөр хэлэлцээд бүлгийн хурлаар уг асуудлыг хойшлуулах нь зүйтэй үзлээ. Учир нь С.Зоригийн амь насыг хөнөөсөн хэргийг яаралтай хэлэлцэж, Үндэсний аюулгүй байдлын зөвлөл хуралдаж, яаралтай шийдвэр гаргах шаардлагатай. Уг асуудал эцэслэн шийдэгдтэл томилгооны асуудлуудыг хойшлуулахаар шийдсэн” гэлээ.

Түүнчлэн “Үүнээс гадна Ерөнхийлөгчийн зүгээс АТГ-ын дарга, дэд даргын бүрэн эрхийн хугацаа дууссан учраас дараагийн АТГ-ын дарга, дэд даргыг томилох асуудлыг хэлэлцэх албан бичиг ирүүлсэн. Мөн АТГ-ын дарга, дэд даргад хоёр хүний нэрийг дэвшүүлсэн. Энэ асуудлаар өмнө УИХ-ын Хуульзүйн байнгын хорооноос бүрэн эрхийн хугацаа нь дуусаагүй байгаа учраас өргөн барьсан хоёр хүний асуудлыг хэлэлцэх боломжгүй гэж шийдвэрлэсэн. Үндсэн хуулийн Цэц дээр АТГ-ын дарга, дэд даргын хугацаатай холбоотой асуудлаар маргаан үүссэн байгаа юм байна. Тиймээс эрх зүйн хувьд маргаантай байгаа асуудлыг УИХ яаралтай шийдэх шаардлагагүй гэж үзэн хойшлууллаа. Томилгооны асуудлыг хойшлуулсан бас нэг үндэслэл нь С.Зоригийн амь насыг хөнөөсөн хэрэгтэй холбоотой асуудлыг эцэслэн шийдвэрлэсний дараа хэлэлцэх хэрэгтэй гэж үзсэн” гэлээ.

Р.Хишигжаргал