Ерөнхий сайд асан Н.Алтанхуяг Сүхбаатар дүүргийн Иргэний хэргийн анхан шатны шүүхэд нэхэмжлэл гаргажээ. Нэхэмжлэлд “Ерөнхийлөгч асан Ц.Элбэгдорж Н.Алтанхуягийн нэр төрд халдсан учир нэр хүндийг сэргээж, мэдээг тараасан хэлбэр, хэрэгслээр няцааж, эдийн бус гэм хорын хохиролд тэрбум төгрөг гаргуулж өгнө үү” гэжээ.

Энэ дагуу Сүхбаатар дүүргийн шүүхээс Н.Алтанхуягийн нэхэмжлэлтэй, Ц.Элбэгдоржид холбогдох нэр төрд халдсан асуудалд иргэний хэрэг үүсгэсэн байна. Мөн зарлан дуудах хуудсыг Ерөнхийлөгч асан Ц.Элбэгдоржид хүргүүлсэн байна. Энэ талаар Ерөнхий сайд асан Н.Алтанхуяг "Шинэчлэлийн Засгийн газраа огцруулаад өгөөч гэж өргөдөл өгсөн мэтээр намайг гүтгэсэн Ц.Элбэгдоржийг шүүхэд өглөө. Түүний мэддэг тооны нэгж нь тэрбум учраас тэрбум төгрөг нэхэмжиллээ. Энэ мөнгийг түүний бий болгосон шударга бусын хонгилыг нураахад бүрэн зарцуулна" хэмээн мэдэгджээ.

Сануулахад, Ерөнхийлөгч асан Ц.Элбэгдорж телевизийн нэвтрүүлэгт оролцох үеэрээ Н.Алтанхуягтай холбоотой зарим зүйлийг ярьсан байдаг. 

С.Сүлд