МАН-ын бүлэг ээлжит бусаар хуралдах тов зарлажээ. Хуралдаанаар Ерөнхийлөгчийн зүгээс Шүүгчийн эрх зүйн байдлын тухай хуульд нэмэлт, өөрчлөлт оруулах хуулийн төслийн талаар бүлэг байр сууриа нэгтгэхээр болсон байна. Шүүгчийн эрх зүйн байдлын тухай хууль нь Монгол Улсын Үндсэн хуульд заасан шүүх эрх мэдлийг хэрэгжүүлэх чиг үүрэг бүхий шүүгчид тавих болзол, шаардлага, шүүгчийн бүрэн эрх, шүүгчийн хараат бус байдал, түүний баталгаа зэрэг шүүгчийн эрх зүйн байдалтай холбогдсон харилцааг зохицуулахад оршдог.

Харин Ерөнхийлөгчийн зүгээс уг хуульд зарим өөрчлөлт оруулах шаардлагатай гэж үзэн хуулийн төсөл өргөн барихаар болсон нь энэ.

Тэгвэл эл хуулийг дагалдуулан АТГ, Шүүх, Ерөнхий прокурорыг ҮАБЗ-ийн зөвлөмжөөр чөлөөлж, түдгэлзүүлж болно гэсэн хуулийн төсөл оруулж ирж байгаа гэсэн мэдээлэл түгээд байна.

Сонирхолтой нь, уг мэдээлэл түгэхтэй зэрэгцэн УИХ-ын дарга Г.Занданшатар захирамж гаргаж “Шүүгчийн эрх зүйн байдлын тухай хуульд нэмэлт оруулах тухай хуулийн төсөл болон хамт өргөн мэдүүлсэн бусад хуулийн төслийг ээлжит бус чуулганаар хэлэлцэхээр нэмжээ. Тиймээс хуулийн төслийг намын бүлэг, Байнгын хороод, чуулганы нэгдсэн хуралдаанаар хэлэлцэхээр болсон гэсэн үг. Магадгүй Шүүгчийн эрх зүйн байдлын тухай хуульд нэмэлт оруулах нь халхавч төдий харин АТГ-ын дарга, Улсын ерөнхий прокурорыг Үндэсний аюулгүй байдлын зөвлөлийн саналаар томилох нь гол агуулга байж мэдэх. Тийм бол Ерөнхийлөгчөөс санал болгож, УИХ-аас томилдог хуулийн байгууллагын томоохон томилгоо Ерөнхийлөгч, УИХ-ын дарга, Ерөнхий сайд гурвын үзэмжээр явна гэсэн үг. Эх сурвалжийн хэлж буйгаар Ерөнхийлөгчийн зүгээс АТГ-ын дарга, Улсын ерөнхий прокурорыг хугацаанаас нь өмнө чөлөөлөх хуулийн төслийг нэн яаралтай дэгээр хэлэлцэхийг хүсчээ. Засгийн газраас ч уг хуулийн төслийг дэмжсэн хариу өгсөн бололтой.

Хэдийгээр ээлжит бус чуулганыг өнөөдөр хаах товтой байсан ч УИХ-ын дарга нэмэлт, өөрчлөлт оруулах захирамж гаргасан нь энэ. Эндээс хэд хэдэн асуулт гарч ирнэ.

Тэр нь Ерөнхийлөгчийн зүгээс ямар шалтгаанаар Шүүгчийн эрх зүйн байдлын тухай хуульд нэмэлт, өөрчлөлт оруулах хуулийн төслийг өргөн барих болов. Түүнийг нь УИХ-ын дарга хүлээн авч ээлжит бус чуулганы хэлэлцэх асуудлын дараалалд гэнэт оруулах болов. Хамгийн гол нь, яагаад яаралтай горимоор хэлэлцээр болов, баталсан өдрөөс нь дагаж мөрдөх өгүүлбэрийг оруулав.

Энэ удаагийн ээлжит бус чуулганаар хэлэлцэх асуудлын дараалалд багтсан асуудлаас АТГ-ын дарга, Улсын ерөнхий прокурорын томилгоотой холбоотой асуудлыг хойшлуулах нь зүйтэй хэмээх МАН-ын бүлгийн шийдвэр өчигдөр гарсан. Нэг үгээр эдгээр асуудал хаврын чуулган руу шилжсэн хэрэг. Гэтэл Ерөнхийлөгчийн зүгээс өөр нэгэн хуулийн төслийг өргөн барихаар болж, тэр дагуу МАН-ын бүлэг хуралдахаар болж, УИХ-ын дарга захирамжиндаа ийн өөрчлөлт орууллаа.

С.Сүлд