УИХ-ын ээлжит бус чуулганаар Шүүгчийн эрх зүйн байдлын тухай хуульд нэмэлт өөрчлөлт оруулах тухай хуулийн төслийн эцсийн хэлэлцүүлгийг хийж байна. Энэ үеэр УИХ-ын гишүүн Ж.Батзандан "Монголын хууль хяналтын салбарт үүссэн завхрал гажуудлыг арилгах зорилгоор Монгол Улсын Ерөнхийлөгчөөс өргөн барьсан хуулийн төслийг хэлэлцэн баталж байна. Монголын хууль хяналтын байгууллага яргын машин болсон гэж Монголын ард түмэн ярьж байгаа. Яагаад яргын машин болсон бэ гэдгийг УИХ-ын гишүүд УИХ-ын гишүүн асан Зоригийг хөнөөсөн хэргийн мөрдөн байцаалтын материал, бичлэгтэй танилцлаа.

Монгол залууд хэрэг тохохын тулд жорлонгийн баастай, шээстэй усыг толгой дээр нь асгаж байхыг харлаа. Эмэгтэй хүний өрөөнд дөрвөн удаа хүн амины хэрэгт холбогдсон гяндангын ялтныг шөнийн цагаар шалдан оруулж байхыг бид нар харлаа. Хэрэг хүлээлгэхийн тулд ээжийнх нь хашаанд цогцос хаяж байхыг бид харлаа. Монгол Улсын жирийн нэгэн залууд хүн амины хэрэг тохохын тулд зургаан хоног камерт нь гяндангын хоёр хоригдлыг оруулж баруун солгойгүй зодож байхыг харлаа. Гар дээр нь суниалгаж галуун цуваа хийлгэж байхыг харлаа.

Шээсээ толгой дээр нь асгаж байхыг харлаа ХХI зууны Монголд хоолонд нь мансууруулах бодис холиод ухаан мэдрэлгүй болгосон гэх мэдээлэл бидэнд байна. Ээжид нь хүн амины хэрэг тохохын тулд хүүхдийг нь цааш харуулсан магадлал ч байна. Ийм аймшигтай гэмт хэргийг зориуд зохиомол хэрэг үүсгэж С.Зоригийн хэргийг хаах зорилготой ажилласан прокурор, мөрдөн байцаагт, тагнуулын ажилтныг үтэр түргэн өөрчлөхийн тулд энэ хуулийг баталж байгаа юм" гэлээ.

Р.Хишигжаргал