УИХ-ын гишүүн О.Баасанхүү С.Зориг агсны амь насыг хөнөөсөн хэрэгтэй холбоотой асуудлаар мэдээлэл хийлээ.

Тэрбээр “УИХ-ын зарим гишүүн намайг энэ асуудал гарахаас өмнө дуугүй байсан. Асуудал сөхөгдөнгүүт үгээ хэлж байгаа юм шиг хандаж байна. Гэтэл үгүй юм аа. Би 2015 оноос хойш буюу Д.Булганыг баривчилсан өдрөөс эхлэн олон нийтэд мэдэгдсэн. Өргөдлийн байнгын хорооны даргын хувьд энэ асуудалд анхаарал хандуулж ирсэн. Тухайлбал, 2016 оны аравдугаар сарын 24-ны өдөр Улсын Ерөнхий прокурор Л.Энх-Амгалан прокурорт бичиг явуулж байсан. Ерөнхийлөгч Х.Баттулгад ч хандаж байсан” гэв.   

Үүнээс гадна тэрбээр өчигдрийн бичлэгийг дүрслэн ярьсан юм. Бичлэгт “Б.Содномдаржаа зогсож байхад хоёр хоригдол орж ирсэн. Хоёр хоригдлын нэг нь Ц.Амгаланбаатар. Тэд нэг камерт хоригдож байгаа үйл явдал гарна. Нөгөө хоёр нь гаднаас эргэлт авах, орон дээр унтах зэрэг арай давуу нөхцөлтэй. Б.Содномдаржааг дэглэж, хэрэг хүлээхийг шаардана. Тэднийг нойльгүй өрөөнд хорьсон болохоор цөмөөрөө хувинд шээдэг. Тэр шээсийг нь Б.Содномдаржаа руу цацсанаас болж зодоон өрнөсөн нь камерт бичигдсэн. Харин Т.Чимгээг унтаж байхад нь нөгөө нөхөр цээж нүцгэн, халаасандаа гараа хийсэн маягтай орж ирээд хэргээ хүлээхийг шаарддаг үйл явдал гарсан. 30 орчим минутын бичлэг байсныг би багцаалж хэллээ.

Бидэнд ч бас 30-аад минутад товчилсноор үзүүлсэн. Тухайлбал, галуун цуваагаар алхуулж байгааг зайг мөн товчилсон байсан. Үүнийг хэвлэлийнхэнд үзүүлэх байх. Харин олон нийтэд жүжигчилсэн тоглолт маягаар үзүүлэх хэрэгтэй. Өөрөөр хэлбэл, Б.Содномдаржааг өөр ямар нэгэн хүнээр орлуулах байдлаар процессыг үзүүлэх хэрэгтэй. Тэр бичлэгийг шууд харуулж болохгүй. Учир нь өндөр настай ээж нь хүүгээ яаж хоригдож байсныг үзэх сайхан биш шүү дээ. Үүнээс гадна олон улсын конвенц гэж бий. Тэр конвенцийн дагуу шүүх хурал дээр хоригдож байгаа хүнийг дүрсийг нь гаргахыг хүртэл хориглодог. Харин зургаар үзүүлж болдог. Тиймээс тэр хүний нэр хүндийг бодсон ч үр хүүхдүүд нь аав нь дэглүүлж байгаа бичлэгийг үзүүлж болохгүй” гэлээ.

Р.Хишигжаргал