УИХ-ын гишүүн О.Баасанхүү өөрийн цахим хуудсаараа дамжуулж мэдээлэл хийлээ. Тэрбээр Би өнөөдөр С.Зоригийн амь насыг хөнөөсөн хэргээр бус өөр сэдвээр мэдээлэл хийх гэж байна. Энэ нь 2018 оны нэгдүгээр сарын 12-нд баталсан Улс төрийн хэрэгт хэлмэгдсэн иргэдийг цагаатгах, тэдэнд нөхөн олговор олгох хуулийн хэрэгжилт хангалтгүй байна. Эцэг, эх, эмээ, өвөөгийнх нь амь насыг хөнөөсөн хэрэгт нөхөн олговор олгохоор баталсан хэрнээ энэ жилийн хувьд зөвхөн 90 настай иргэдэд нөхөн олговор олгохоор заасан байна. Ирэх жил ямар зохицуулалт хийхийг мэдэхгүй. Иргэдээс маш олон гомдол ирж байна. Учир нь хэлмэгдсэн иргэдийн үр хүүхэд нь өндөр настай. Хэдэн жил амьд явахыг хэн ч мэдэхгүй. Уг нь хэлмэгдсэн иргэдийн 400-500 үр хүүхэд амьд байгаагэсэн судалгаа байдаг юм байна. Ийм байхад нөхөн олговрыг нь цаг алдалгүй олгох хэрэгтэй. Энэ утгаараа Ерөнхий сайдад албан бичиг өгч, хандахаар болсон. Нөгөө нэг асуудал нь “Жи тайм”-ын хохирогчидтой холбоотой.

“Жи тайм” пирамид сүлжээний улмаас 11437 иргэн хохирсон. Эдгээрээс 40 тэрбум төгрөг төвлөрүүлснээс 20 тэрбум төгрөгийг урамшуулалд тараасан. Хохирсон иргэдийн 4000 иргэн нь манай Эрдэнэт хотынх. Мөрдөн шалгах ажиллагааны явцад “Хаан банк”-ны дансан дахь 6.9 тэрбум төгрөгийг битүүмжилсэн. Монгол Улсын хилээр орж ирсэн 300 орчим сая төгрөгийн зургаан ширхэг автомашин, 4.1 тэрбум  төгрөгийн үнэ бүхий 76329 ширхэг бараа хурааж авсан байна. Жи таймыг үүсгэн байгуулагч М.Марат гэдэг нөхөр мөрдөн шалгах ажиллагааны үеэр оргон зайлсан учир интерполоор эрэн сурвалжилж байна. Казахстан Улсын Цагдаагийн ерөнхий газарт хүсэлт гаргасны дагуу Дэд сайд нь энэ талаарх арга хэмжээ авахаар ажиллаж байгаа гэсэн.

Өнөөдөр “Инээдмийн баяр” учраас нэг онигоо ярьж өгье. Дандаа л болж бүтэхгүй зүйл ярьж явна гэж юу байхав, тийм биз дээ. Нэг нөхөр зах дээр гурван ширхэг тоть зарах гээд явж байна гэнэ. Худалдан авагч “Энэ тоть ямар үнэтэй вэ” гэж асуухаар нь “500 рүбль”.  “Яагаад ийм үнэтэй юм бэ” гэж асуутал “Энэ тоть орос, англиар ярьдаг” гэж хариултал тэгвэл “Энэ тоть ямар үнэтэй вэ” гэж асуухаар нь “10 мянган рүблийн үнэтэй. Орос, англи, герман, францаар ярьдаг”. Тэгвэл “Гурав дахь тоть нь ямар үнэтэй юм бэ” гэж асуутал “15 мянган рүбль. Гэхдээ ямар ч хэлээр ярьдаггүй. Энэ хоёрынхоо дарга нь юм аа” гэж хариулжээ. Үүн шиг Жи тайм ч бай, монголчууд бидэнд тулгамдаж байгаа асуудлын гол нь мэдлэггүй, мэдээлэлгүйгээс улбаатай гэдгийг цаг ямагт санаж яваарай” гэв.

Г.Нацаг