Өнгөрсөн долоо хоногт УИХ-ын дарга Г.Занданшатар ОХУ-аас Монгол Улсад суугаа Онц бөгөөд бүрэн эрхт Элчин сайд И.К.Азизовыг хүлээн авч уулзсан билээ. Энэ үеэр УИХ-ын дарга Г.Занданшатар энэ онд төрийн өндөр, дээд хэмжээний айлчлалууд болон хэд, хэдэн томоохон хамтарсан арга хэмжээ зохион байгуулах төлөвлөгөөтэй ажиллахаа дуулгасан юм.

Тухайлбал, Халх голын байлдааны 80 жилийн ойг тэмдэглэн өнгөрүүлэх хүрээнд ОХУ-ын Ерөнхийлөгч В.В.Путины Монгол Улсад хийх албан ёсны айлчлалын бэлтгэл ажлыг хангаж эхэлснээ хэлсэн юм. Энэ хүрээнд Шадар сайд, Батлан хамгаалахын сайдаар ахлуулсан ажлын хэсэг байгуулан ажиллаж байгаа аж. Халх голын байлдааны 80 жилийн ойн арга хэмжээний хүрээнд ОХУ-ын талаас Дорнод аймгийн Халх гол сумыг жишиг сум болгох ажил эхэлжээ. Мөн Оросын армийн Александровын нэрэмжит дуу, бүжгийн чуулгын тоглолтыг Монголд зохион байгуулахаар төлөвлөгөөтэй байгаа гэсэн мэдээлэл байна.

Мөн Шадар сайд Ө.Энхтүвшин болон Батлан хамгаалахын сайд Н.Энхболдоор ахлуулсан Халх голын байлдааны 80 жилийн ойг тэмдэглэх ажлын хэсэг байгуулагджээ.

ОХУ-ын Ерөнхийлөгч В.В.Путин нь 2000, 2009, 2014 онд манай улсад айлчилж байсан юм.

Дамшрамд дуулгахад, Халх голын байлдааны 80 жилийн ойг тохиолдуулан түүхэн кино хийх талаар хоёр орны Ерөнхийлөгчид өнгөрсөн онд харилцан зөвшилцсөн юм. Киноны зураг авалт эхэлсэн бөгөөд ойн үеэр нээлтээ хийхээр төлөвлөсөн байна. 

Г.Эрдэнэ