“Гэр хороолол” хөдөлгөөнөөс Д.Сүхбаатарын талбайд зохион байгуулсан жагсаалыг цагдаагийн байгууллага албан хүчээр тараасан талаар мэдээлэл хийлээ.

Тэдний зүгээс "Тайван жагсах гол зорилго маань гэр хорооллын иргэдийн амьдралд анхаарлаа хандуулаасай, халуун устай болох нөхцлийг бүрдүүлээсэй гэж хүссэн. Гэтэл бидний санал хүсэлтийг сонсох нь битгий хэл балмадаар хөөсөн хотын даргыг огцрохыг шаардаж бид дараагийн жагсаалаа зохион байгуулна. Бид энэ баасан гарагт буюу дөрөвдүгээр сарын 5-нд Эрх чөлөөний талбай дээр дахин жагсана.

Өнгөрсөн баасан гарагийн өглөө 11:00 цагт тайван жагсаалаа эхлүүлсэн. Хуулийн хүрээнд тайван жагсаал хийх гэсэн боловч цагдаа нар бидний майханг урж, жагсаалаа тараахыг шаардсан. Хэнийг ч буруутгаагүй, турхираагүй зөвхөн хариу хүлээж сууж байсан боловч бямба гарагийн 11:00 цагт Нийслэлийн Засаг даргын хууль бус захирамжийг бидэнд танилцуулсан. Түүнд "Нийгмийн эмх замбараагүй байдал үүсгэж байгаа уг иргэдийг албадан тараа" гэсэн утга агуулга бүхий зүйлийг уншиж өгсөн.

Түүний дараагаар маш олон цагдаа нарын хүчээр танхай балмадаар биднийг хөөн явуулсан. Төрийн эргэлт хийе гээгүй, бусдыг ямарваа нэгэн зүйлд уриалан дуудаагүй байтал хотын иргэдийнх нь 80 хувь гаруй амьдарч байгаа гэр хорооллынхон халуун устай болмоор, тухтай амьдрах нөхцлөө бүрдүүлж, инженер шугамыг шийдээд өгөөч гэснийхээ төлөө нохой шиг балмадаар хөөгдлөө.

Улстөрчид нь гэр бариад өлсгөлөн зарлаад сууж болдог бусад энгийн иргэд нь болдоггүй юм уу. Дэмжээд ирсэн хүмүүсийн автомашиныг одоо хүртэл журамласан байна. Биднийг сошиал орчинд харлуулах, гүтгэх үзэгдэл хэрээс хэтэрлээ. Олигархуудын хөлсний бичээчид өнгөрөгч амралтын өдрөөр завсар зайгүй ажиллалаа. Цагдаагийн байгууллагаас мөн хэвлэлийн бага хурал зарласан байна лээ. Талбай дээр сууж байсан хорин хэдэн хүнийг яаж албадан тарааж байгаа, майхан савыг урж тасдан, нурааж байгаа бичлэгээ нэг бүрчлэн үзүүл гэмээр байна" гэлээ.

С.Сүлд