Засгийн газрын Хэрэг эрхлэх газрын дарга Л.Оюун-Эрдэнэ төрийн албан хаагч казино тоглосоныг тогтоосон тохиолдолд ажлаас шууд чөлөөлөх тухай мэдэгдсэн байдаг. Тэрбээр “Төрийн албан хаагчид буюу төрийн өмчит үйлдвэрийн газрын захирлууд Солонгост очиж казино тоглодог тоо баримтаараа манайх нэлээд дээгүүрт ордог гэсэн статистик өгч байна. Тэгэхээр үүний логик уялдаа нь авлигал гэж харагдаж байгаа юм. Дарга нар нь тэнд валютын урсгалаараа казинодоод байдаг. Төрийн албан хаагчид нь цалин хүрэлцээгүйн улмаас хар ажил хийгээд байдаг. Тиймээс Засгийн газраас Төрийн албаны ёс зүйн дүрмийг шинэчлэх Ажлын хэсэг байгуулахаар чиглэл гарч байна. Бүх шатны төрийн албан хаагчид, тэр дундаа төрийн удирдах албан тушаалтнууд, төрийн өмчит үйлдвэрийн газрын захирлууд хэрэв ямар нэгэн байдлаар мөрийтэй тоглоомын газарт орж баригдаад, бичлэг нь байх юм бол ёс зүйн дүрэм зөрчсөн гэж үзэн ажлаас нь шууд чөлөөлөх чиглэл гаргасан байгаа” гэсэн юм.

Тэгвэл өнөөдрийн Засгийн газрын ээлжит хуралдаанаар төрд ажиллаж буй хэнбугай ч мөрийтэй тоглох, казино тоглосон тохиолдолд хариуцлага тооцохоор шийдвэрлэжээ. Ингэхдээ иргэд, олон нийтийн хяналт чухал гэдгийг Ерөнхий сайд холбогдох сайд нарт үүрэг болгосон байна.

Хуулийн үндэслэл нь:

‪Төрийн албаны тухай хуулийн 40.2-г үндэслэж Засгийн газраас тогтоох нь:

Төрийн захиргааны болон үйлчилгээний албан хаагчийн ёс зүйн дүрмийн 3 дахь хэсгийн 3.1.4.в, 3.1.4.г дэх дэд заалтууд нэмж гадаад улсад албан томилолтоор ажиллах хугацаандаа дипломат ёс жаягийг хатуу барих...мөрийтэй, казино тоглохгүй байхаар зааж өгчээ.

Энэ талаар Засгийн газрын Хэрэг эрхлэх газрын дарга Л.Оюун-Эрдэнэ "Засгийн газрын өнөөдрийн хуралдаанаар 2019 оны 33 дугаар тогтоолоор батлагдсан төрийн бүх шатны албан тушаалтны ёсзүйн дүрэмд нэмэлт өөрчлөлт оруулж 3.4-т мөрийтэй тоглох казино тоглохгүй байх энэ төрлийн тоглоомын газраар үйлчлүүлэхгүй байх гэж тусгаж зохицуулсан. Аливаа улс төрийн болон төрийн албан тушаалтан олон нийтийн сайн сайхны төлөө өөрийн сайн дурын үндсэн дээр тангараг өргөж ажилладаг албан хаагчид. Энэ нь Монгол Үндсэн хуулийн 16-р зүйлд хүний үндсэн эрх эрх чөлөөг зохицуулсан 18 заалтын дөрвийг нь сайн дурын үндсэн дээр хязгаарлуулж байгаа гэж төрийн албан хаагчдад ойлгуулж болно. Харамсалтай нь сүүлийн 10 гаруй жилийн хугацаанд энэ асуудал хавтгайрч казино тоглох замаар мөнгө угаалт, авилгал хээл хахуулийн нөлөөлөлд автах ийм нөхцөл байдалд Монгол улсын төрийн албан хаагчид тэр дундаа төрийн өмчит үйлдвэрийн газрын дарга захирлууд холбогдох болсон. Манай улстай адил ардчилал хөгжиж байгаа улс оронд казино тоглохыг ёсзүйн дүрмээр хязгаарласан байдаг. засгийн газрын энэхүү дүгнэлтийг удирдах албан тушаалтнуудад үүрэг даалгавар өгсөн. Хамгийн чухал нь олон нийтийн хяналт, хэвлэл мэдээллийн хэрэгслийн хүчтэй хяналт чухал байна. тиймээс аль нэг төрийн албан тушаалтан, тэр дундаа удирдах албан тушаалтнууд казино тоглож байгаа нөхцөл байдал илэрвэл ЗГХЭГ-т мэдээлэл өгч болно. Хэрэв тухайн албан хаагч казино тоглож буй мэдээлэл ирж, тэр нь батлагдсан тохиолдолд ёсзүйн дүрмээр ажлаас нь чөлөөлөх арга хэмжээ авна” гэлээ.

С.Сүлд