2019 оны УИХ-ын хаврын чуулганыг ирэх баасан гарагт нээнэ. Энэ парламентын бүрэн эрхийн хугацаан дахь дорвитой шийдвэр гаргаж болох хаврын чуулгантай зэрэгцэн сөрөг хүчин АН-аас жагсаал зохион байгуулахаа мэдэгдэв. Тодруулбал, АН-ын дарга С.Эрдэнэ, гишүүн Б.Пүрэвдорж тэргүүтэй тус намын удирдлагууд мэдээлэл хийхдээ ЖДҮХС-гаас зээл авсан гишүүдэд хариуцлага тооцох, ШХАБ-д элсэх асуудал болон 2016 оны МАН-ын амлалтыг жагсаалаар сануулах зорилгоор Төв талбайд жагсаал зохион байгуулахаа мэдэгдсэн юм.

Хаврын чуулган хөшгөө нээхтэй зэрэгцэн АН албан ёсоор бүлэггүй болж, УИХ-аар хэлэлцэж байгаа асуудлаар завсарлага авах эрхгүй болох учиртай. АН-ын бүлгийн дарга Д.Эрдэнэбат энэ тухай тодорхой ярьсан. Тэрбээр ээлжит бус чуулганы үеэр мэдээлэл хийхдээ хаврын ээлжит чуулганы эхэнд УИХ дахь АН бүлгийнхээ үйл ажиллагааг дуусгавар болгохоо хэлсэн байдаг. Энэ тухай “Л.Болд гишүүн өөрийнхөө сонголтыг хийсэн юм шиг байна. Бид үүнд хүндэтгэлтэй хандана. Бүлэг байхгүй боллоо гээд АН байхгүй болчих юм биш. Сөрөг хүчин хэвээрээ байна. Үйл ажиллагаагаа явуулдгаараа явуулна. Зөвлөлийн хэлбэрт шилжинэ. Гэхдээ бидэнд ганц боломж алдагдах нь завсарлага л авах боломжгүй болно” гэсэн юм. Тэгэхээр хаврын чуулганаар АН бүлэггүй болж албан ёсоор “гудамжинд” гарах нь цаг хугацааны асуудал болов.

Сөрж чадахааргүй сөрөг хүчний хэмжээнд гурван жилийг үзсэн АН-ын хувьд зөвхөн өнөөдөр ийм байдалд орж байгаа юм биш. Өмнө нь орж л байсан. 2000-2004 онд МАН 72 суудал авч, АН дөнгөн данган хоёр суудал авч байлаа шүү дээ. Харин өнөөдөр МАН дахин УИХ-д үнэмлэхүй олонхийг бүрдүүлж байгаа энэ цаг үед есөн гурван жилийн хугацаанд суудлынхаа хүчинд бүлэгтэй явж асан АН-ынхан зөрчлөөсөө үүдэж албан ёсоор Бүлэггүй болох нь. Ямар ч байсан хаврын ээлжит чуулган нээлтээ хийхтэй зэрэгцэн Төв жагсаал хийхээ зарлав.

Гагцхүү “60 тэрбум”, ЖДҮ Засгийн газар зэрэг улс төрд өндрөө авсан ашиг сонирхлын зөрчлөөс үүдсэн урд өмнөх жагсаал, цуглааныг бодоход энэ удаад АН-аас зохион байгуулах эсэргүүцлийн жагсаалд хэдэн хүн ирэх вэ гэдэг сонирхолтой юм. Бүх нийтийн эсэргүүцлийн жагсаалын дараа баярын хурал, концерт үзэж, бүр хүндэтгэлийн хүлээлт авалт, бөхийн барилдаан зохион байгуулах хөтөлбөр гаргасан нь шүүмжлэлд өртөж эхэлсэн учраас ийн тодотгосон хэрэг.

Р.Хишигжаргал