Хуулийн байгууллагын алба хаагчид авлига хээл хахуулийн хэрэгт нэр холбогдохтой зэрэгцээд бусдыг эрүүдэн шүүсэн хэрэг ил болсон нь ёстой л гал дээр тос нэмэх шиг болов. Ард иргэдийн хувьд хуулийн салбарынхны нэр хүндэд халдсан гэж нэг хэсэг нь өмөөрөх бол нөгөө хэсэг нь “Тэдний булхайг илчиллээ” хэмээн алга ташиж байгаа харагдав. Юутай ч цагдаагийн байгууллагад алба хааж байсан хурандаа нар тухайн гэмт хэргийг замаас зувчуулж, хэрэгсэхгүй болгохын тулд бусдаас хээл хахууль авдаг, хахууль нэхдэг байсан тухай ноцтой мэдэгдлийг хоёр эрхэм хийсэн юм. Энэ бол УИХ-ын гишүүн Н.Номтойбаяр болон Улсын Ерөнхий прокурорын орлогч прокурорт нэр тодроод байсан А.Цэрэнсодном. Эдгээр эрхмүүд нэг нэгнээсээ өрсөн байж нэг өдөр хэвлэлд өгсөн ярилцлага нь сошиал ертөнцийн гол сэдэв болж, амтай болгоны ярианы сэдвээр тодроод байна.

УИХ-ын гишүүн Н.Номтойбаярын хувьд “Цензургүй яриа” нэвтрүүлэгт оролцох үеэрээ “Цагаан суварга”-ын ордыг хайгуулын ажилд хэдий хэр хэмжээний хөрөнгө зарцуулсан, өөрийн аав Б.Нямтайшир болон бусад бизнес эрхлэгч нар Монголын эдийн засгийн хөдөлгөгч хүч мөн эсэх талаар ярихын зэрэгцээ Мунзуй хочит Г.Нямдоржийн биед халдсан талаараа “Шүүх эмнэлгийн дүгнэлтээр 0.5 мм-ийн зузаантай мохоо зүйлээр үүссэн зулзарт гэж гарсан” гэж хэлсэн юм.

Хэргийг нэхэн сануулбал, 2013 оны есдүгээр сарын 25-ны 00.00 цагийн үед Сүхбаатар дүүргийн Цагдаа­гийн хэлтэст 990784... дугаараас “Нямтайширын Номтойбаяр гэдэг хүн миний хэвлийд хутгаар хатгаж танхайрлаа” хэмээн Баттулга гэх хүн утасдаж дуудлага өгчээ. Мөн шөнийн 00.30 цагт Сүхбаатар дүүргийн нутаг дэвсгэр 220 мянгатын 1-38 тоотод оршин суугч Д.Баттулга гэгч хүн Н.Номтойбаяр нь надад гэмтэл учруулсан хэмээн өргөдөл бичиж өгсөн байна.

Үүний дараа Цагдаагийн ерөнхий газраас “УИХ-ын гишүүн Н.Номтойбаяр бааранд танхайрч, хүний биед мэсээр гэмтэл учруулсан нь тог­тоогдсон. Тиймээс түүнд өнөөдөр /2013.09.27/-өөс эх­лэн Эрүүгийн хуулийн 181.3-аар эрүүгийн хэрэг үүсгэн шалгаж эхэлсэн. Энэ нь олон нийтийн газар, гудамж талбайд мэсний зүйл барин танхайрсан гэх зүйл анги юм” хэмээн мэдэгдэж байжээ.

Харин тэрбээр энэ хэргийн талаар хэвлэлүүдэд дараах зөрүүтэй тайлбарыг өгсөн байдаг. Тодруулбал,

-“Центрпоинт”-ийн гэх хэрэгт хол­богдож байсан Г.Ням­доржтой маргасан. Гэхдээ би хүн рүү хутга бариад дайрах хүн биш. Тэр л өөрөө зуушны хутга бариад над руу дайраад байсан. Яагаад дайрсныг нь би мэдэхгүй. Надад хамгаалагч байхгүй. Манай найз хориглоод гадаа гаргаад түүнийг нэг хоёр цохисон гэсэн. Өөр зүйл болоогүй. Би гаднын хэдэн хүн, найзтайгаа ажил хэргийн уулзалттай байсан. Тэр газрын нэрийг нь сайн санахгүй байна. Би архи уугаагүй.  

/mongolnews.mn/

-Би юу боллоо гэж хүн хутгалах вэ дээ. Харин нэг танхай этгээд над руу дайрсан. Тийм л юм болсон. Бааранд биш зоогийн газарт болсон. Ордны хойд талд байрладаг франц хоолны газар сууж байсан. Гэтэл гаднаас “мунзуй” хочит Нямдорж орж ирсэн. Тэр Нямдоржид өмнө нь би их хэмжээний мөнгөө алдаж, залилуулж байсан. Тэгээд мөнгөө нэхсэн чинь над руу дайрсан. Солонгост байхдаа банканд солиулаад ир гэсэн мөнгийг аваад алга болсон хүн шүү дээ, “мунзуй” хочит Нямдорж чинь.

/news.mn/

-“Шинэ дэлхий” телевизийн захирал Ч.Энх-Эрдэнэ, МҮОНРТ-ийн захирал асан н.Ариунболд, тэгээд нэг гадаад найзтайгаа бид нэг газар сууж байсан юм. Гэтэл гаднаас “Центрпоинт”-ын н.Нямдорж орж ирээд хутга барьж над руу дайрсан. Тэгээд тэр газрын хамгаалагч, зөөгч нар салгаад би түрүүлээд явсан. Гэтэл тэр н.Нямдорж “Шинэ дэлхий” телевизийн захирал Ч.Энх-Эрдэнийг зодоод зугтаасан байсан.

/dnn.mn/

 -Тэр “News.mn” дээр бичсэн худлаа шүү. Тэр Нямдорж гэдэг чинь энд тэнд залилан хийсэн нөхөр байдаг юм. Тэр л манай найзыг зодчихоод зугтаасан байна билээ.

/“Улс төрийн тойм” сонин/

гэсэн ярилцлага, тодруулгыг хэвлэлд өгч байжээ. Тэгвэл “Мунзуй” хочит Г.Нямдорж “Мань хүн намайг танихгүй гэсэн байна лээ. Бид хоёр чинь нэг байрны багын найзууд. УИХ-ын гишүүн болохоос нь өмнө гурван жил хамт явсан. Цаадхийг чинь дагуулаад баар ресторанаар их явдаг байлаа.  Миний нэр нөлөөгөөр л явна шүү дээ. Тэрнээс биш цаадхийг чинь захын бацаан цохиод унагачихна. Мөнгөтэй болохоор хүний зан их эвдэрдэг юм байна. Ширээн дээр байсан хутга бариад над руу дайрсан. Төрөлхийн зан чанар нь гэх үү дээ. Бие хамгаалагч нь дундуур орж ирээд зүсүүлчихсэн байх. Намайг бол амжихгүй л дээ” гэсэн ярилцлага өгч байжээ.

Ямартай ч Монголын эдийн засгийн багагүй хэсгийг нуруундаа үүрдэг, баялаг бүтээгчдийн нэг гэж цээжээ дэлддэг “МАК”-ийн Б.Нямтайширын хүү, УИХ-ын гишүүн Н.Номтойбаярт холбогдох эл хэрэг хэрэгсэхгүй болсон юм.

Гэхдээ энд хамгийн гол зүйл бол энэ хэргээр дамжуулж, Н.Номтойбаяраас цагдаагийн хурандаа нэг сая ам.доллар нэхсэн гэдэг асуудал. Түүний хэлснээр цагдаагийн албанд ажилладаг байсан цагдаагийн хурандаа уг мөнгийг нэхэхдээ Мунзуй хочит Г.Нямдорж болон Н.Номтойбаярын багын найзаар дамжуулж нэхсэн гэж хэлсэн.

Энэ тухайгаа ярихдаа тухайн үед Цагдаагийн ерөнхий газрын даргаар Б.Билэгт хурандаа ажиллаж байсан. Түүний доод хүмүүс гэдгийг тодоос тод онцолж хэлсэн юм. Түүний хэлснээр цагдаагийн хурандаа үнэхээр нэг сая ам.доллар нэхэмжилсэн үү эс бөгөөс Мунзуй хочит Г.Нямдоржийг гэмтээсэн гэх хэргийн талаар ярихдаа утга агуулгын зөрүүтэй ярьсан шигээ мөн л чулуу хөөлгөж байна уу гэдэг нь сонирхол татаж байна. Ямартай ч цагдаагийн байгууллагад ажиллаж байсан, тэр дундаа бригадын генерал Б.Билэгтийн удирдлага дор ажиллаж байсан хурандаа хүн бусдаас хахууль авсан нь үнэн бол дагаад Б.Билэгтийн нэр ч гэсэн нэр холбогдохыг үгүйсгэхгүй юм.

Тэгвэл хэвлэлийн гол сенсаацийн эзнээр тодорсон дараагийн хүн бол Улсын Ерөнхий прокурорын орлогч прокуророор нэр дэвшээд байсан А.Цэрэнсодном. Түүний хувьд Улсын, Нийслэлийн, Тээврийн, Сонгинохайрхан, Сүхбаатар дүүргийн прокурор, Төв, Хэнтий аймгийн прокурорын газар гээд анхан шатнаас дээд шатны байгууллагуудад хяналтын прокурор, ахлах прокурор, хэлтсийн даргаар ажилласан туршлагатай.

Эндээс үзвэл прокурорын байгууллагын удирдлагын бүрэлдэхүүнд байж болохоор хүн.

Гэвч бусдаас 154 сая төгрөг нэхэж, дарамталж байгаа бичлэг ил болсноор Х.Баттулга Ерөнхийлөгчийн халаасны хүн гэгдэх нэрийг зүүх хувь тутсан юм. Яг л “Зэрэг нэмэхийн өмнө” кинонд гардаг шиг түүний нэрийг Ерөнхийлөгч санал болгож, УИХ-аар хэлэлцүүлэхээс хэдхэн хоногийн өмнө ийнхүү зэрэг ахиж чадаагүй тэрбээр “Өдрийн сонин”-д ярилцлага өгч дотроо уужилсан. Гэвч түүний хэвлэлд өгсөн ярилцлага өөрийг нь цайруулах бус харин ч хэвлэлийн “хар хонгил” руу чирчих шиг боллоо. Учир нь тэрбээр бусдаас их хэмжээний мөнгө нэхэмжилсэн шалтгаан нь бусдын юмыг бус харин өөрийн юмаа нэхсэн хэрэг. Өөрөөр хэлбэл, 16 нас хүрээгүй охидтой бэлгийн харилцаанд орж, тэдний биеийг 600-800 ам.доллараар үнэлдэг байсан гэх Гүрсэдийн Наранхүүтэй 2010 онд танилцсан. Биднийг Ч.Отгонжаргал найз маань танилцуулах үед, танилцсны дараа ч Г.Наранхүүг бага насны охидтой ёс бус харилцаанд ордог байсныг мэдээгүй. Гэтэл нэг өдөр Ч.Отгонжаргал “мөнгө хэрэгтэй байна” гээд туслахыг хүссэн. Миний тусч зан хөдөлсөн бас зээлсэн мөнгөө өсгөж өгнө гэхээр нь хожоотой юм шиг санагдсан. Тэгээд л дүү охиныхоо Ланд-200, үе дамжиж ирсэн хөөргөө өгсөн. Ингээд ахиж мөнгөнийхөө барааг хараагүй. Г.Наранхүү бага насны охидтой ёс бус харилцаатай байсан нь ил болох үед Сингапур руу зугтаасан юм билээ. Дараа нь уулзах үеэрээ 10 сая ам.доллартай байсан. Гэтэл насанд хүрээгүй охидтой самуурсан хэргээ дарахын тулд цагдаагийн хурандаа нарт таван сая ам.долларыг өгч, эрүүгийн хариуцлагаас мултарч зугтсан гэдгээ хэлсэн. Үүнийгээ надад санаандгүй ярьсан болохоор ил болохоос айж намайг гүтгэж байна. Нөгөөтэйгүүр Гүрсэдийн Наранхүү насанд хүрээгүй охидтой самуурсан байхад тэр хариуцлага хүлээгээгүй. Харин түүнд зуучилсан хүн нь зургаан жилийн хорих ял аваад шоронд ялаа эдлээд гарч ирсэн гэж ярьсан юм.

Эндээс үзвэл хутга шөвөгний асуудалтай холбогдсон УИХ-ын гишүүнээс нэг хурандаа сая ам.доллар нэхэмжилж, бага насны охидтой самуурсан УИХ-ын гишүүн Наранхүүтэй андуурагдаж явсан Гүрсэдийн Наранхүү хэргээс мултрахын тулд цагдаагийн хурандаа нарт таван сая ам.долларын хахуул өгсөн болж таарах нь.

Хамгийн гол нь дээрх мөнгөн дүн буюу хахуульд авсан, хахууль өгөхийг нэхсэн гэх мөнгөний жим яван явсаар нэг хүнийг чиглэж эхлэх шиг боллоо. Учир нь эх сурвалж болоод нэр бүхий албан тушаалтнуудын хэлж буйгаар Цагдаагийн ерөнхий газрын даргаар Б.Билэгтийг байх үед хуулийг уландаа гишгэлж, бусдын үйлдсэн хэргийг хахуулаар хаадаг байсан хурандаа нар байсан. Тэдний нэг нь Н.Номтойбаяраас сая ам.доллар нэхэмжилж, Гүрсэдийн Наранхүү гэгчээс таван сая ам.доллар авсан гэх хурандаа мөн гэх шуум байгаа юм.

Тэгвэл өөрийгөө зургаан сая ам.доллараар үнэлсэн хурандаа хэн бэ гэдэг асуулт урган гарч ирж байна. Тиймээс Н.Номтойбаяр болоод А.Цэрэнсодном прокурорын эл мэдэгдлийн дагуу АТГ болон ТЕГ-аас хяналт шалгалт хийхгүй бол ёстой л алдас болно гээч нь болох биз ээ.

Г.Нацаг-Эрдэнэ