Нийслэлийн захирагч бөгөөд Улаанбаатар хотын дарга С.Амарсайханы төрсөн ах С.Уламбаяр Туул голын онцгой хамгаалалтын бүсэд барилга байгууламж барьсан гэх асуудал сүүлийн үед яригдаж эхлээд байгаа. Үүнтэй холбоотой асуудлаар хотын дарга С.Амарсайханаас зарим зүйлийг тодрууллаа.

-Таны ах Туул голын онцгой хамгаалалтын бүсэд барилга барьсан гэх мэдээлэл байна. Тайлбар өгөөч?

-Миний ахын нэр дээр байж байгаад шилжүүлсэн гэсэн. Надад ямар ч хамааралгүй гэсэн.

-Таны ахын компани юм байна шүү дээ?

-Аж ахуйн нэгжийн асуудлыг өөрсдөөс нь асуу.

-Та уг асуудлаар ахтайгаа уулзсан уу?

-Тэр хүнд хамаагүй. Та нар яваад шалгаад үз.

-Бүртгэл.мн сайтад С.Уламбаяр гээд таны ахын нэр дээр байсан шүү дээ. Тухайн үед хууль хяналтын байгууллагынхан ч энэ талаар хэлж байсан?

-Хууль хяналтын байгууллагынханд асуудлууд нь яригдаад явж байгаа. Байгаль орчин, аялал жуулчлалын яамнаас нь очоод асуугаарай.

-Таны хамаарал бүхий этгээд ийм асуудалтай байхад өөр иргэний эрхийг цуцлах нь зөв юм уу?

-Иргэн, аж ахуйн нэгж хууль зөрчсөн бол тухайн байгууллагатай нь очиж ярь. Надад хамааралтай асуудал биш.

-Таныг Засаг даргаар томилох үед ашиг сонирхлын зөрчилтэй байна гэсэн асуудал яригдаж байсан?

-Авлигатай тэмцэх газраасаа очиж тодруулаарай.

-Энэ компанийнхаа үйл ажиллагаа зогсоочихож болдоггүй юм уу?

-Энэ асуудлаар өөрсдөө яваад асуугаарай.

-Тэгвэл танд хамааралгүй юм бол хууль зөрчсөн компанийн эрхийг цуцлахгүй юм уу?

-Иргэний ч бай, аж ахуйн нэгжийн ч бай үйл ажиллагааг хууль зөрчсөн гэдгийг хуулийн байгууллага тогтоогоогүй байхад би хэний ч асуудалд орох эрхгүй.

Б.Лхам