Гадаад харилцааны сайд Д.Цогтбаатар Дэлхийн банкны Монгол Улс, БНХАУ, БНСУ-ыг хариуцсан Бүсийн захирал Мартин Райзер болон Дэлхийн банкны Монгол Улс дахь Суурин төлөөлөгчөөр шинээр томилогдоод буй Андрей Михнев тэргүүтэй төлөөлөгчдийг хүлээн авч уулзлаа.
Уулзалтын үеэр сайд Д.Цогтбаатар “1990 оноос ардчилал, зах зээлийн эдийн засагт дэмжлэг үзүүлж ирснийг дурдаад үүнд Дэлхийн Банк группийн үүрэг оролцоо чухал байр суурь эзэлж байсан юм. Тухайн үед манай улсын ДНБ гурван тэрбум ам.доллар байсан бол өнөөдөр 12 тэрбумд хүрч хөгжиж чадсан байна” гэдгийг онцоллоо.
Мөн Дэлхийн Банктай дэд бүтцийн хөгжил, экспортын бараа бүтээгдэхүүний нэр төрлийг олшруулж, чанар стандартыг сайжруулах, харилцан мэдээлэл солилцох зэрэг чиглэлээр хамтын ажиллагаагаа өргөжүүлэх талаар санал солилцов.
Бүсийн захирал Мартин Рейзер Дэлхийн Банкаас Монгол Улстай хөгжүүлж ирсэн бат бэх, амжилттай түншлэлээ улам урагшлуулан хөгжүүлэхийн төлөө хичээн ажиллаж, дэд бүтцийн салбарыг хөгжүүлэхэд санхүүжилт, хүний нөөцийн дэмжлэг үзүүлж ажиллахад анхаарах болно гэжээ.
