Өнгөрөгч гуравдугаар сарын 26-ны өдөр гоо сайхны хагалгаанд орсон 29 настай эмэгтэй амь насаа алдсан талаар бид өчигдөр мэдээллэсэн билээ. Талийгаач “Тод каннам” эмнэлэгт өөх соруулах хагалгаа хийлгэсэн бөгөөд хагалгааны үеэрээ зүрхний ачаалал нэмэгдсэн тул Улсын нэгдүгээр төв эмнэлэгт яаралтай хүргэсэн байдаг. Гэвч гурав хоног ухаан оролгүй байсаар энэ сарын 1-ний өглөө нас барсан юм.

Тэгвэл одоогоос 10 жилийн өмнө Монголын алдартай дуучин эмэгтэйн нөхөр Улсын нэгдүгээр төв эмнэлэгт өөх соруулсны дараахан нас барсан.

Хэргийг нэхэн сануулбал, тухайн үед хагалгаа амжилттай болсон боловч хагалгааны дараа цусанд бохир орж, улмаар дотуур цус алдснаас болж амиа алдсан юм. Хагалгаа хийсэн эмч нарын тусгай зөвшөөрлийг шалгах үеэр энэ төрлийн мэс ажилбар хийх эрхгүй байсан нь ил болсон байдаг. Өөрөөр хэлбэл, өөх соруулах хагалгааг ямар ч туршлагагүйгээр хийсэн нь ийнхүү бусдын аминд хүрэх шалтгаан болсон юм. Хэргийн улмаас хагалгаа хийсэн эмч нар эмчилгээ хийх тусгай зөвшөөрлөө цуцлуулж, хууль хяналтын байгууллагын үүдийг цөөнгүй жил сахисан байдаг. Гэхдээ хамгийн гол нь доод шатны эмч нар нь эмнэлгийн байрыг дураараа ашиглаж, эрхийг нь авч  мэргэшээгүй мэс засал хийж бусдын амийг хөнөөж байхад эмнэлгийн удирдлагууд хэн нь ч мэдээгүй гэж мэлзсэнээс гадна мөн л хэн нь хариуцлага хүлээлгүй өнгөрсөн юм.  

Тэгвэл энэ сарын 1-нд нас барсан эмэгтэй нь бүтэн мэдээгүйжүүлэлттэй хагалгаанд орсон бөгөөд энэ үеэр зүрхний ачаалал нэмэгдэж, улмаар ухаан ороогүй юм.

“Тод каннам” эмнэлгийн хувьд Монголд чамлахааргүй нэр хүндтэй. Олон жил тогвортой үйл ажиллагаа явуулж байгаа эмнэлэг. Тус эмнэлэгт мэс засал хийдэг эмч нар нь БНСУ-даа тэргүүлэх зэрэгтэй тооцогддог. Монголд тогтмол хуваарийн дагуу ирж, эмчилгээ болон хагалгаа хийсний дараа үйлчлүүлэгчийн биеийн байдал тогтворжсоны дараа Солонгос Улс руу буцдаг тогтсон жишигтэй.

Гэтэл тус эмнэлэг нь эмчилгээний гоо сайхны нөхөн сэргээх үйлчилгээ үзүүлэх чиглэл авсан хэдий ч өөх соруулах хагалгаа хийх зөвшөөрөл үйл ажиллагааны чиг үүрэгт заагдаагүй байсан аж. Шалгалтаар хагалгаа хийх зөвшөөрөлгүй, хаягын зөрчилтэй, мэргэжлийн эмчгүйгээр хагалгаа хийсэн нь илэрсэн байна. Тиймээс тусгай зөвшөөрлийг цуцлах арга хэмжээ авахаар холбогдох байгууллагад нь хүргүүлжээ.

Хэргийг Хан-Уул дүүргийн цагдаагийн нэгдүгээр хэлтэст мөрдөн шалгаж эхэлсэн бөгөөд шүүх эмнэлгийн дүгнэлт гараагүй учир тодорхой мэдээлэл өгөх боломжгүй байгаа юм байна.

Шүүх эмнэлгээс үхлийн шалгааныг эцэслэн тогтоосны дараагаар хэрэгт холбогдогчийг татан шалгах юм.

Эндээс л дээрх эмнэлэг үүдээ бариад хариуцлагаас өнгөрөх үү эс бөгөөс хагалгаа хийсэн эмч нар л хариуцлага хүлээгээд хэрэг замхрах уу гэдэг асуулт урган гарч ирээд байна.

Хамгийн гол нь галбиржуулан турааж, гоолиг биетэй болгоно гэж амлаад олон сая төгрөгийн нь авсан хэрнээ үүнийх нь оронд алтнаас ч үнэтэй амийг нь хороодог энэ мэт үзэгдлийг одооо л таслан зогсоохгүй бол оройтох биз ээ.

Тиймээс л тусгай зөвшөөрлийг нь цуцлаад өнгөрөх бас харин ч төрийн төмөр нүүр гэгчийг хатуухан шиг харуулах замаар эрдэнэт хүний алтан амиар наадах гэсэн цагаан нөмрөгтөнгүүдэд хатуухан сануулга болгох нь зүйтэй биз ээ 

Г.Нацаг