Улаанбаатар хотын агаарын бохирдлыг бууруулахад дэмжлэг үзүүлэх төсөл, арга хэмжээг санхүүжүүлэхэд зориулж, БНСУ-ын Засгийн газраас 500 сая ам.долларын хөнгөлөлттэй зээл авахаар Монгол Улсын Засгийн газар тохиролцсон билээ. Засгийн газар хоорондын ерөнхий хэлэлцээрийг өнгөрөгч 2018 оны нэгдүгээр сарын 16-ны өдөр байгуулсан юм.

Энэхүү ерөнхий хэлэлцээрийн хүрээнд талууд “Солонго-1”, “Солонго-2” орон сууцны хороолол, “Баянголын ам түрээсийн орон сууцны хороолол” төслүүдийг хэрэгжүүлэхээр тохиролцсон байна. ТЭЗҮ-ийн судалгааг БНСУ-ын Эксим банкны буцалтгүй тусламжаар зээл авах стандартад нийцүүлэн шинэчлэн сайжруулахаар энэ сарын 3-ны өдөр санамж бичигт гарын үсэг зурсан юм.

Санамж бичигт Монголын талаас Сангийн яамны Төрийн нарийн бичгийн дарга С.Наранцогт, Барилга, хот байгуулалтын яамны Төрийн нарийн бичгийн дарга С.Магнайсүрэн, ТОСК-ийн ийн захирал Ж.Хичээнгүй харин БНСУ-ын талаас “Эксим” банкны Эдийн засгийн хөгжлийн хамтын ажиллагааны сангийн хэрэгжилт хариуцсан газрын захирал Кү Бун Хён нар гарын үсэг зурсан.

Түүнчлэн “Баянголын ам түрээсийн орон сууцны хороолол” төслийн ТЭЗҮ-ийн судалгааг 613 мянган ам.долларын тусламжаар хэрэгжүүлэх тухай санамж бичигт Монголын талаас Сангийн яамны Төрийн нарийн бичгийн дарга С.Наранцогт, НЗДТ-ын газрын дарга М.Отгонбаяр, “НОСК”-ийн захирал Б.Сүхбаатар болон БНСУ-ын талаас “Эксим” банкны Эдийн засгийн хөгжлийн хамтын ажиллагааны сангийн хэрэгжилт хариуцсан газрын захирал Кү Бун Хён нар гарын үсэг зурав.

Ийнхүү БНСУ-ын Засгийн газраас авах 500 сая ам.долларын зээлээр 7026 айлын орон сууц барьснаар Улаанбаатар хотын агаарын бохирдол буурна гэж албаныхан үзжээ.