УИХ-ын өнөөдрийн нэгдсэн чуулганаар Улсын Ерөнхий прокурорт Б.Жаргалсайханыг томилох эсэх асуудлыг хэлэлцэж байна. Энэ үеэр УИХ-ын гишүүн Ж.Батзандан “Б.Жаргалсайхан Улсын Ерөнхий прокурорт нэрт дэвшиж байгааг шударга ёсны төлөөх тэмцлийн үр дүн гэж бодож байна. Олон хүнээс таныг асуухад бүгд “Сайн хүн” гэж хэлсэн. Гэхдээ Улсын Ерөнхий прокурор улс орныхоо нийгмийг ойлгодог байх хэрэгтэй. 30 жил Монголыг Ц.Элбэгдорж тэргүүтэй мафийн бүлэглэл удирдаж ирсэн. МАНАН мафитай тэмцэх амаргүй, их эр зориг шаардана. Үүний эсрэг зогсоохын тулд таныг томилж байна. Таны ажилд өндөр амжилт хүсэн ерөөе” гэлээ.  

Харин Б.Пүрэвдорж гишүүн “Хууль хяналтын байгууллагын алба хаагчдын цалин, хангамж өндөр байж шударга ёс тогтоно гэж үздэг. 2016 онд Төсвийн тухай хуулийг хэлэлцэхэд би прокурорын цалинг нэмэгдүүлэх шийдвэр гаргасан. Та 2016, 2017 онд хэдэн төгрөгийн цалин авч байснаа хэлэх байх. Таныг мөнгөний төлөө бус шударга ёсны төлөө ажиллана гэдэгт итгэлтэй байна” гэхэд

Улсын Ерөнхий прокурорт нэр дэвшээд буй прокурор Б.Жаргалсайхан

“2016 онд прокурорын алба хаагчид цалин бага байсан. Үүнийг дагаад тогтвор суурьшилт ажиллах боловсон хүчин цөөхөн байлаа. Төсвийн хууль батлагдсанаас хойш 2016 онд 880 мянган төгрөгийн цалин авч байдаг болсон бол одоо сая гаруй төгрөгийн цалин авч байна” гэлээ.

Мөн Т.Аюурсайхан гишүүн “Их хүч хөдөлмөрөөр Монголд шинэчлэл хийгдэж байна. Та салбартаа 30 гаруй жил ажилласан туршлагатай хүн байна. Бидний өөрчлөлт шинэчлэлийн зорилгыг та мэдэж байгаа байх. Прокурорын байгууллага улс төрийн байгууллага болсон. Үүнийг өөрчлөөрэй. Таны удирдах байгууллагын нэр хүнд унасан. Энэ бүхэн олон асуудлаас шалтгаалсан. Прокурорын байгууллагын ажилчид улстөрчдийн гар хөл болсон тохиолдол цөөнгүй бий. Та үүнд анхаарч ажиллаарай. Таньд амжилт хүсье” гэлээ.

Б.Бат-Эрдэнэ: Эцэслэж шийдвэрлэгддэггүй том том хэргийг анхаарч цэгцлэхэд анхаараарай. Хөдөө орон нутгийн иргэд энэ асуудлыг шийдвэрлүүлэхийг хүсч байна. Төрд ажиллаж байгаа хүмүүс хувийн хэрэглээгээ хязгаарлаж байх ёстой.

Гэтэл манай нөхдүүд өөрийн авгай хүүхдэдээ лиценз авдаг. Хэрэглээг төрийн албан хаагчид анхаарч ажиллаарай. Төрд насаараа ажилчихаад олон зуун сая төгрөгний байр машинтай хүн зөндөө байна. Та хаана амьдардаг вэ. ХОМ-гээ нууцалдаг албан тушаалтан олон бий.

УИХ-ын гишүүн С.Чинзориг: Шударга зарчимч ноён нуруутай ажилж чадах байх гэсэн итгэл бий. Төрд болон хууль хяналтын байгууллагад итгэх олон түмний итгэл алдагдсан. Энэ цаг үед ажлаа хүлээж авч байна. Шударга ёсыг тогтоохын тулд ажиллаарай. Хүн бүрийг хуулийн өмнө эрх тэгш байлгах, иргэдээ алагчлалгүй ханддаг байгаасай.

Прокурорын байгууллагын нэр хүнд сүүлийн нэг жилийн турш асар хурдан доройтсон. Энэ нь мэргэжлийн чиг баримжаа алдагдсантай холбоотой. Өөрөөр хэлбэл цагдаа нарыг прокурорт томилдог. Хоёрдугаарт томилогдсон хүндээ ажилладаг, бүлэглэлүүдэд үйлчилдэгтэй холбоотой. Энэ бүхнийг үгүй хийх байх гэж найдаж байна. Томоохон хэргүүдийг хуулийн хүрээнд нь авч үзэж, хурдан шуурхай шийдвэрлэж ажиллаарай. Мөн ЖДҮХС-ийн зээлтэй холбоотой асуудлыг нэг тийш нь шийдэж, олон нийтэд үнэн бодит мэдээлэл өгөхийг хүсч байна.

Р.Хишигжаргал