Монгол Улсын Ерөнхий сайдын 2010 оны 25 дугаар захирамжаар Монголын багш нарын VII их хурал энэ сарын 11-12-нд Ерөнхий сайд У.Хүрэлсүхийн ивээл дор Төрийн ордонд зохион байгуулагдах гэж байна. Үүнтэй холбогдуулан БСШУС-ын сайд мэдээлэл хийлээ.

Тэрбээр “Багш нарын их хурал 1935 онд анх зохиогдсон түүхтэй. Үүнээс хойш олон жилийн давтамжтай зохион байгуулагдаж, сүүлд 1996 онд хуралдсаанаас хойш завсарласан байдаг. Энэ удаагийн их хурал "Сайн багш сайхан ирээдүй" уриан дор зохион байгуулагдах бөгөөд 800 орчим багш төлөөлж оролцоно. Багш нарын нийгмийн асуудал, цалин хөлс зэрэгт төр засгаас анхаарал хандуулж ирсэн. Хурлаар багш нарын хөдөлмөрийн нөхцөл, ажлын ачаалал, ажиллах орчин нөхцөл, хөдөлмөрийн үнэлэмж, цалин хөлсний асуудлыг хэлэлцэнэ. Багш нарын цалин хөлсийг инфляцтай уялдуулж нэмэх боломжтой байвал цалинг нь нэмнэ. Энэ удаагийн хурлаар их, дээд сургуулиудын багш нарын хөгжлийг хэлэлцэнэ. Мөн багш, боловсролын салбартай холбоотой хууль, эрхзүйн орчны талаар хэлэлцэнэ" гэсэн юм.

Түүнчлэн “Өмчийн хэлбэр харгалзалгүй нэгдүгээр ангид хүүхэд авахдаа бүртгэлийн хураамж, сонгон шалгаруулалтгүй байх захирамж гаргасан. 50 сурагч элсүүлэхийн төлөө яагаад 1000 хүүхэд бүртгэж, өрсөлдүүлэх ёстой юм бэ. Цэцэрлэгээ дөнгөж төгссөн хүүхдүүдийг сургуульд элсүүлэхийн тулд шалгалт авдаг байх ёсгүй. Тиймээс ийм захирамж гаргасан. Нэг үгээр хэлбэл, энэ бол мөнгөний төлөөр ажил болчихоод байна. Мөн зургаан нас хүрээгүй хүүхдийг нэгдүгээр ангид элсүүлэхгүй гэсэн шийдвэр гаргасан” гэв.

Монголын багш нарын VII их хуралтай холбоотойгоор БСШУСЯ-ны төрийн нарийн бичгийн дарга Баярсайхан “Багш нарын VII их хуралд хот, хөдөөгийн цэцэрлэг, ерөнхий боловсролын сургууль, албан бус, насан туршийн боловсрол, МСҮТ, их, дээд сургуулийн 47.6 мянган багшийг төлөөлж, 800 багш, удирдах ажилтан оролцоно. Төлөөлөгч сонгох ажлыг шударга байлгах, Монгол Улсын өнцөг булан бүрээс оролцуулах үүднээс эрхийг аймаг, орон нутгийн удирдлагад шилжүүлсэн. Их хурал зохион байгуулах ажлын хэсэгт Хөдөлмөр нийгмийн хамгааллын яам, Монголын багш нарын холбоо, Багш нарын үйлдвэрчний эвлэлийн холбоо, Монголын ахмад багш нарын холбоо, Монголын залуу багш нарын холбоо хамтран оролцоно” гэлээ.

Р.Хишигжаргал