Монгол Улсын Ерөнхий прокурорын орлогч прокурорт нэр дэвшээд буй М.Чинбат, С.Алиманцэцэг нарын томилгоотой холбогдуулан өчигдөр нээлттэй хэлэлцүүлэг хийсэн билээ. Хэлэлцүүлэгт ЗГХЭГ-ын дарга Л.Оюун-Эрдэнэ, УИХ-ын гишүүн Х.Нямбаатар, Л.Болд, Ж.Батзандан, Т.Аюурсайхан болон иргэний нийгмийн байгууллагын төлөөлөл оролцож, асуулт асуусан юм.

Энэ үеэр Л.Болд гишүүн “Манай хувьсгалын удирдагч Л.Оюун-Эрдэнэ сайд “Уучилж болохгүй, ухарч болохгүй, ядарч болохгүй” гэдэг сайхан үг хэллээ. Энэ үгийг бичиж аваад хана, таазан дээрээ хадах хэрэгтэй” гэж хэлсэн юм.

Тэрбээр ийн хэлсэн шалтгаан нь ЗГХЭГ-ын дарга Л.Оюун-Эрдэнэ “Улстөрчдийн захиалгаар албан тушаалын томилгоог хийх нь шударга ёс алдагдах эхлэлийг тавидаг. Тиймээс Улсын Дээд шүүхэд ч асуудал тавьсан. Хоёр нэр дэвшигчийн хувьд нэр цэвэр хүмүүс. Зарим улстөрчид “Огт танихгүй хүмүүс байна” гэдэг асуудал ярьж байна лээ. Үүнд би харин ч баяртай байна. Хэн нэгэнд танигдахын төлөө зүтгээгүй, улстөрчдийн захиалгаар энэ албанд нэр дэвшээгүйд нь бахархаж байна. Тиймээс хоёр нэр дэвшигчиддээ хандаж хэлэхэд “Шударга ёсны төлөө бүү шантраарай, бүү ухарч, няцаарай” гэдгийг хэлмээр байна” гэсэн юм.

Г.Эрдэнэ