УУХҮ-ийн сайд Д.Сумъяабазар Оюутолгойн гэрээ болон Тавантолгой-Зүүнбаян чиглэлийн 414.6 километр төмөр зам тавих асуудлаар байр сууриа илэрхийллээ.
Тэрбээр “Оюутолгой” компани 2010 оноос хойш бүтээн байгуулалтад нийт 8.7 тэрбум ам.долларыг зарцуулснаас 2.3 тэрбум ам.долларыг татвар хураамж хэлбэрээр улсын төсөвт төвлөрүүлсэн. Салбар хариуцсан салбарын сайдын хувьд “Дубайн гэрээ”-г сайн гэрээ гэж хэлэхгүй. “Оюутолгой” төслийн гэрээг төгс гэрээ гэж хэлэхгүй. Гэхдээ сайжруулж, засч залруулах боломж бий. “Оюутолгой” төслийг зогсооно гэсэн асуудал байж болохгүй. Хэлэлцээний ширээний ард сууж ухаалгаар шийдэх ёстой.
Энэ гэрээний явцаас дараа дараагийн гаднын хөрөнгө оруулагчид Монголд хөрөнгө оруулах эсэхээ шийдэх гээд байгаа учраас нухацтай, соёлтой хандах ёстой. Гаднын хөрөнгө оруулагчдын бодлогыг бид бодлогоор дэмжих ёстой. Мөн төсөв, эдийн засгаа нэмэх бодлогыг чухалчлах нь зөв. Салбарын сайдын хувьд салбараа хамгаалах бодлого барьж ажиллахаас өөр арга байхгүй" гэсэн юм.
Харин Тавантолгой-Зүүнбаян чиглэлийн 416.6 км төмөр зам барих Засгийн газрын шийдвэрийн талаар
“Өнгөрсөн онд нүүрсний үнэ өссөнөөс төсөвт орж ирсэн мөнгөөр барина. Зүүнбаянгийн төмөр зам “Эрдэнэс Тавантолгой”-н IPO хийхэд хурдасгуур болно гэж харж байгаа. Мөн эдийн засгаасаа илүү нийгмийн тооцоолошгүй үр ашигтай.
Энэ хөндлөн төмөр замыг манай Засгийн газар, эсвэл Х.Баттулга Ерөнхийлөгч болонгуутаа шийдсэн зүйл огт биш. Социализмын үед “Уул уурхайн бүтээн байгуулалтын зам” гээд зургийг нь гаргачихсан байдаг. Цаашдаа хөндлөн замыг аль болох тавих хэрэгтэй, Дорнодоос Говь-Алтай ч юм уу чиглэлд. Гашуунсухайтын төмөр замыг ч мөн барина. Энэ замыг барихад дотоодын аж ахуйн нэгжүүд хөрөнгө босгох боломжтой. Улс төржихгүй л бол энэ хоёр замыг Монгол Улс нөөцөө шавхаад ч болов барих бүрэн боломжтой гэлээ.
Г.Алимаа
Сэтгэгдэл (9)