УИХ-ын нэгдсэн хуралдаанаар Ерөнхийлөгчөөс өргөн мэдүүлсэн Улсын ерөнхий прокурорын орлогчоор М.Чинбат, С.Алиманцэцэг нарыг томилох зөвшилцөх саналыг хэлэлцэж гишүүдийн 86.2 хувиар дэмжлээ. Энэ үеэр УИХ-ын гишүүн Д.Хаянхярваа “Хууль шүүхийн байгууллагын нэр хүнд унасныг хүн бүхэн ярьж байгаа. шүүх, Прокурорын байгууллага Монголд оршин тогтнохын аргагүй болсон мэтээр ч ярих болсон. Хууль шүүхийн байгууллагын систем бүхлээрээ  чадамжгүй болсон гэдэгтэй би санал нийлэхгүй. Унасан нэр хүндээ сэргээхийн төлөө та бүхэн сайн ажиллаарай. Улстөрчид бид ч гэсэн анхаарах хэрэгтэй.

Бид та бүхний ажилд дэм болж ажиллах ёстой. Улс төрөөс ангид ажиллах ёстой. Улстөрчдөөс ангид байж чадаагүйн улмаас хууль шүүхийн байгууллагын нэр хүнд унасан. Цаашид улстөрчидтэй та бүхний нэр холбогдоод эхлэх л юм бол унасан нэр хүндээ сэргээх боломжгүй шүү. Олны анхааралд байгаа хэргүүдийн талаар мэдээлэл өгч баймаар байна, хуулийнх нь хүрээнд хэргийн явцыг мэдээлдэг  байх ёстой” гэв. Харин нэр дэвшигч С.Алиманцэцэг “Прокурорын байгууллага шүүх засаглалын байгууллагад ордог нь зөв гэж би хувьдаа үздэг. Прокурорын байгууллагын дэргэдэх мөрдөн байцаах алба зайлшгүй байх ёстой. Үүнийг дахин байгуулах асуудалд санал нэг байдаг” гэсэн бол М.Чинбат “1992 оны Үндсэн хуулийн өөрчлөлтөөр прокурорын байгууллагыг шүүх эрх мэдлийг хэрэгжүүлэгч байгууллага гэж оруулсныг би бас дэмждэг. Прокурорын байгууллагын дэргэдэх мөрдөн байцаах албыг сэргээх ёстой гэдэгтэй санал нэг байна” гэлээ.

Мөн Хууль зүй, дотоод хэргийн сайд Ц.Нямдорж “Бүлгийн хурал дээр та хоёрын талаар шүүмжлэлтэй үг хэлсэн, бодвол та хоёрын чихэнд хүрээ байлгүй дээ. Цаашдаа харгалзан ажиллах байх гэж найдаж байна. Ажлаа сайн хийх хэрэгтэй дээ. Завхрал ер бусын ихээр гарсан. Эрүүгийн байцаах хуулийн дэлхийн жишгийн гурван гол зарчим мөрдөгдөхөө больсон.  Нэгдүгээрт, гэм буруугүй хүнийг эрүүгийн хариуцлагад татаж болдоггүй заалт сүүлийн хэдэн жил байхгүй болсон. Дуртай хүнээ уураа хүрсэн үедээ хорьж байгаад гаргадаг олон асуудал бий. Энэ талаар дорвитой арга хэмжээ авах ёстой.

Хоёрдугаарт, мэтгэлцэх зарчим байхгүй болсон. Өмгөөлөгчийг юу ч биш болгосон, мөн хуулийг нь байхгүй болгосон. Шаардлагатай гэвэл нууц задруулахгүй гэсэн баталгаа гаргаж аваад, амыг нь скочдоод, ариун цэврийн өрөө рүү ороход нь хар масктай, буутай хүн дагаж явдаг болсон. Прокурорууд нь урдаа хэргийн материалаа тавьчихаад цатгалан бар шиг суудаг болсон. Эргэлзээ гарах юм бол яллагдагчийн талд ашигтай шийдвэрлэнэ гэсэн алтан зарчим алдагдсан. Энэ бүх алдааг засах байх гэж та хоёрт найдаж байна. Гэм буруугүй хүн нэг ч минут ял эдлэх ёсгүй” гэсэн юм.

Мөн УИХ-ын гишүүн Ц.Гарамжав Бид нэг албан тушаалтныг нөгөөгөөр солиогүй, хууль шүүхийн өмнө тулгамдсан асуудлыг шийдэх томилгоо юм гэдгийг хэлсэн юм.

УИХ-аас дэмжлэг хүлээсэн М.Чинбат, С.Алиманцэцэг нарыг Ерөнхийлөгч Х.Баттулга зарлиг гарган томилсноор тэд үүрэгт ажлаа хүлээж авна.

С.Сүлд