Хууль зүй, дотоод хэргийн сайд Ц.Нямдоржоос зарим асуултад хариулт авлаа.

-Тагнуулын ерөнхий газрын дарга асан, хошууч генерал Б.Хурцыг цагдаагаас баривчилсан байна. Хотын дарга асан Э.Бат-Үүлийг баривчлах гэж байгаа мэдээлэл бас байна?

-Б.Хурцыг баривчилсан тухай мэдээлэл өчигдөр надад ирсэн. Э.Бат-Үүлийг баривчлах гэж байгаа талаар мэдээлэл байхгүй. Наадах чинь одоохондоо худал мэдээлэл байна.

-Таныг гурван хэрэгт холбогдуулан Тагнуулийн ерөнхий газраас шалгаж байгаа гэсэн мэдээлэл гарсан байна лээ?

-Одоогоор мэдэгдсэн юм алга. Тагнуулынхан надтай уулзаагүй удаж байна. Өнөөдөр дахин хэрэг үүсгэлээ гэх мэт элдэв юм гараад байхаар нь би асуусан. Үгүй л гэж байна лээ. Захиалагатай юм байлгүй дээ.

-Мэдээлэл хийхдээ улсын нууцтай холбоотой асуудлыг ил болгосон гэж буруутгаж байгаа гэсэн?

-Хүн тамлах чинь улсын нууц юм уу. Эрүүдэн шүүх чинь нууц уу. Улсын нууцын хууль гэж байна. Төрийн хамгаалалтад авсан, задруулбал үндэсний эрх ашиг, үндэсний ашиг сонирхолд хохирол учруулах мэдээллийг улсын нууц гэнэ гээд тодорхой заачихсан байгаа. Наадах чинь нууцтай хамаарахгүй.

Г.Сонор