Нийслэлийн Налайх болон Багануур хотын захирагч Ш.Хаан, Н.Тавинбэх нарыг эрэн сурвалжилж байна. Ийн тодотгох болсон шалтгааныг одоо сийрүүлье. НИТХ-ын ээлжит 25 дугаар хуралдаанаар эдийн засгийн дэд бүтцийг тэнцвэртэй хөгжүүлэх, хүн амын хэт төвлөрөл болон хотын хангамж, үйлчилгээ, аж ахуйн үйл ажиллагааг зохицуулах, оршин суугчдын нийгмийн асуудлыг шийдвэрлэх, байгаль орчны зохистой харьцааг хадгалах зорилгоор нийслэлийн дагуул-Багануур хотыг Багануур дүүрэгт, нийслэлийн дагуул-Налайх хотыг Найлах дүүрэгт байгуулах шийдвэр гаргасан байдаг. Энэ дагуу дагуул хот байгуулах ажлыг 2014 оны аравннэгдүгээр сараас эхлүүлсэн юм. Улмаар хоёр дүүргийн иргэдээс Хот байгуулах асуудлаар санал асуулгыг явуулахад Налайх дүүргийн иргэдийн 96 хувь нь, Багануур дүүргийн иргэдийн 95 хувь нь хот байгуулахыг дэмжсэн билээ.

Энэ дагуу Налайх хотын Захирагчийн сонгуулийг 2015 оны зургаадугаар сарын 14-нд зохион байгуулахад Ш.Хаан санал өгсөн нийт сонгогчийн 50,87 хувийн саналыг авснаар бүрэн эрхийг нь баталгаажуулж байв.

Энэ үеэр нийслэлийн Засаг дарга Э.Бат-Үүл “Нийслэлийн анхны дагуул хотыг байгуулж, түүний Захирагчийг сонгосон нь түүхэн үйл явдал болж байна. Налайх хотын Захирагчаар сонгогдсон Ш.Хаан нь анхны дагуул хотын Захирагч гэдгээрээ түүхэн үүрэг авч, ажиллана гэдгийг онцлон хэлмээр байна. Өөрөөр хэлбэл иргэдээсээ сонгогдсон, иргэдрүүгээ хадаг барьж гүйдэг дарга болох нь. Налайх хот нь тус дүүрэгт тогтоосон эдэлбэр газрынхаа хэм хэмжээгээр тухайн нутаг дэвсгэрийг хамран хөгжлийн хөтөлбөр, ерөнхий төлөвлөгөөгөө гаргаж ажиллана. Хот, дүүрэг эрх мэдлийн хуваарилалтаа хуулийн дагуу хийж, хариуцлагатай ажиллаарай” гэж байлаа.

Мөн Налайх хотын удирдлагын бүтцийг дүүргийн ЗДТГ-ын бүтцээс салгаж эхний ээлжид Захиргаа, санхүү, Нийтийн үйлчилгээ, Хот байгуулалтын гурван хэлтэс 14 хүний орон тоотой Захирагчийн ажлын алба байгуулахаар тогтож, цалин, урсгал зардал, санхүүжилтийг шийдвэрлэсэн юм.

Харин Багануур хотын Захирагчийн сонгуулийг 2015 оны аравдугаар сарын 18-нд зохион байгуулахад нэр дэвшигч Н.Тавинбэхийн 57.72 хувийн саналаар сонгогдож байв. Тэгэхэд НИТХ-ын дарга Д.Баттулга “Энэ шийдвэр нь Багануур дүүргийн иргэдийн олон жилийн хүсэл хүлээлт байсан юм. Өөрийн гэсэн дүрэм, төсөв, аж ахуй, төлөвлөлтэй анхны хотын иргэн нь оршин суугч Та бүхэн болж байна. Анхны ардчилсан чөлөөт сонгууль болсон 25 жилийн ойн түүхэн үйл явдлын жил анх удаа Багануурчууд Та бүхэн чөлөөтэй шууд сонгох эрхээ эдэлж хотын Захирагчаа сонгосонд таатай байна” хэмээж байсан юм.

Тухайн үеийн хотын удирдлагуудын онцолсноор Багануур дүүрэгт хот байгуулснаар Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 он хүртэлх хөгжлийн чиг хандлагын дагуу нүүрсний уурхай, эрчим хүч, нүүрс боловсруулах, нано технологи, барилгын материал, хөнгөн хүнсний үйлдвэр, эрүүл мэнд, тээвэр ложистикийн төв болж, 2030 он гэхэд 60000 орчим хүн амтай хот болон хөгжинө хэмээн үзсэн байдаг. Мөн оршин суугчдын амьд явах, эрүүл аюулгүй амьдрах орчин сайжрах, өмч хөрөнгийн үнэ цэнэ нэмэгдэх, тулгамдаж буй асуудлаа өөрсдөө шийдвэрлэх, хотоо удирдах, төлөвлөх, хянах, хотын удирдлага, оршин суугчид нэг л дүрэм журмын хүрээнд харилцах боломж нээгдэхийг хэлж байлаа шүү дээ.

Хачирхалтай нь, алслагдсан хоёр дүүргээ түшиглэн дагуул хот байгуулах нийслэлийн удирдлагуудын шийдэл хөрсөн дээр буусангүй, бодит ажил хэрэг болж чадалгүй дөрвөн жилийг ардаа үджээ. Хатуухан хэлэхэд байгаа оносонгүй. Налайх, Багануурын захирагч Ш.Хаан, Н.Тавинбэх гэж ямар хүн, хэрхэн үйл ажиллагаа явуулдаг нь ч тодорхойгүй байна.

Тиймээс Налайх, Багануурын захирагч Ш.Хаан, Н.Тавинбэх нарыг эрэн сурвалжилж байна. Тэгэхгүй бол бүрэн эрхийг нь батламжилснаас хойш юу хийсэн, ямар ажил хэрэгжүүлсэн нь тодорхой бус явсаар ажлаа хүлээлгэж өгөх бололтой. Эцэст нь асуухад Налайх, Багануур хотын иргэн Та захирагчаа таньдаг уу?

Г.Сонор