УИХ-ын чуулганы нэгдсэн хуралдаанаар хэлэлцэх асуудалтай холбогдуулан гишүүд горимын санал гаргалаа.

УИХ-ын гишүүн Т.Аюурсайхан “Эрдэнэсийн сангийн орлого, зарлагатай холбоотой тогтоолын хэрэгжилтэд хяналт тавих тухай тогтоолын хэрэгжилтэд хяналт тавих саналыг хүргүүлсэн. Монголбанкны үйл ажиллагаанд шалгалт хийсэн ажлын хэсгийн дүгнэлттэй холбогдуулж авах зарим арга хэмжээний тухай тогтоол баталсан. Үүнээс хойш ажил хангалтгүй явагдсаар ирсэн. Үүн дээр хяналт шалгалтыг дахиж хиймээр байна. Бүхэл бүтэн арилжааны банк дампуурлаа. Иргэд хохирлоо. Дээрэмдсэн үйл ажиллагаа явагдаж байна. Урьдаас зохион байгуулагдсан ажил мөн. Энэ асуудалд УИХ-аас хяналт тавих ёстой. Төрийн нууцтай холбоотой биш асуудлыг нууц болгож дарагдуулж байна. Эрдэнэсийн санд асар өндөр үнээр юм худалдан авч байна. Иргэдийн үл хөдлөх хөрөнгийг маш өндөр үнэлсэн. Амбаарыг 50 сая төгрөгөөр үнэлсэн байх жишээтэй. Тиймээс Монголбанкны эрх хүлээн авагчид хяналт тавих хэрэгтэй байна хэмээв. 

УИХ-ын гишүүн Ж.Ганбаатар: ЖДҮ-ийн хуулийг хэзээ хэлэлцэх вэ. Ээлжит бус чуулганаар хэлэлцэх гэсэн яаралтай хэлэлцэх асуудал биш гэсэн. Одоо ээлжит чуулганаар хэлэлцүүлмээр байна. Санаачилсан гишүүндээ байна уу, лобби багатай болохоор хойшлуулаад байна уу. 

УИХ-ын гишүүн Л.Энхболд: Усны тухай хуулийн төсөл хэлэлцэгдэж байгаа. Монгол Улсын нийт усны нөөцийн 1.9 хувь нь газрын дор байдаг. Үүнийхээ цэнгэг орд болох хүн ардад шууд хэрэглэх усаа хамгаалалтад аваад үлдэх санал гаргасан. Байгаль дэлхий, хүн ардын талаасаа энэ хуулийг хараасай гэж бодож байна. 

УИХ-ын гишүүн Д.Эрдэнэбат: УИХ сүүлийн үед ач холбогдол багатай хууль хэлэлцээд байна. Эдийн засгийн ач холбогдол талаас нь харахгүй байна. "Оюутолгой"-н ажлын хэсэг болон Засгийн газар өөр өөр саналтай яваад байна. Энэ асуудал хэзээ орж ирэх вэ. Ялангуяа Оюутолгой дээр Засгийн газрын байр суурь ямар байгааг Ерөнхий сайд хэлэх болсон. Засгийн газар сүүлийн үед жагсаал цуглаан зохион байгуулдаг парад хийдэг боллоо. Хэрүүл зодоон руу сэвсэн асуудлын дор эдийн засаг нурж байна. Төмөр замын асуудал юу болсон бэ.

Ийнхүү гишүүд горимын санал хэлсний дараагаар УИХ-ын дарга Г.Занданшатар "УИХ-ын даргын зөвлөлөөр хуралдаж, хэлэлцэх асуудлаа баталж байгаа. ЖДҮ-тэй холбоотой, Оюутолгойтой асуудал УИХ-ын даргын зөвлөлийн хурлаар орж ирээгүй. Бэлтгэл нь хангагдсан асуудлыг чуулганаар хэлэлцүүлдэг. Б.Пүрэвдорж гишүүн Монголбанкны Ерөнхийлөгчийг огцруулах, Тавантолгойн асуудал зэргийг Эдийн засгийн байнгын хороо бэлтгэн оруулж ир" хэмээв. 

Усны тухай хуулийн төслийг үргэлжлүүлэн хэлэлцэж, санал хураалт явууллаа. Гишүүдийн 64:3 хувийн саналаар Усны тухай хуульд нэмэлт өөрчлөлт оруулахыг хэлэлцэхийг дэмжлээ.

Г.Эрдэнэ