УИХ-ын чуулганы нэгдсэн хуралдаанаар Монгол Улсаас ОХУ-д суугаа Онц бөгөөд Бүрэн эрхт Элчин сайд Б.Дэлгэрмааг эгүүлэн татах асуудлаар санал хураахад гишүүдийн дэмжиж, Ерөнхийлөгчид хүргүүлэхээр болов. Энэ үеэр УИХ-ын гишүүн Д.Эрдэнэбат “Элчин сайдыг эгүүлэн татах тухай ийм зөвшилцлийн бичиг ирүүлсэнд Ерөнхийлөгчийн Тамгын газарт харамсч байна. Улстөржсөн утга бүхий шийдвэр гаргасан. Б.Дэлгэрмаа чамгүй сайн ажилласан гэж харж байгаа. Харин энэ хүнийг ажлаа өгөхөд нэр төрд нь сэв суулгахаар бичиг УИХ-д оруулж ирсэн нь буруу. Уг нь Б.Дэлгэрмаа дөрөвдүгээр сарын 05-нд Ерөнхийлөгчид өргөдлөө өгсөн. Хугацаа дуусч байгаа учраас чөлөөлж өгнө үү гэж. Тэр нь энэ байна.
АН-ын Үндэсний бодлогын хороо дөрөвдүгээр сарын 7-нд хуралдсан. Б.Дэлгэрмаа өргөдлөө өгчихөөд улс төрийн албан тушаалд очсон.
Зүй нь Ерөнхийлөгч өргөдөл өгсний дагуу гэсэн тайлбартай оруулж ирэх ёстой байтал улс төрийн албан тушаал давхар хашсан гэж улстөржүүлж оруулж ирсэн нь буруу. З.Энхболд даргыг байсан бол хэлэх л байлаа. Даанч алга” гэв. Санаж байгаа бол Ерөнхийлөгч Х.Баттулга Б.Дэлгэрмааг Элчин сайдаас эгүүлэн татах асуудлаар зөвшилцөх бичгээ энэ сарын 15-нд хүргүүлсэн. Б.Дэлгэрмааг өргөдлөө өгснөөс 10, АН-ын Үндэсний бодлогын хорооо хуралдаж дэд даргаар томилсноос найм хоногийн дараа гэсэн үг.
Нэг үгээр Б.Дэлгэрмаагийн өргөдлийг авч хэлэлцэж, холбогдох хариуг нь өгөөгүй атлаа гэнэтхэн хуульд харшилсан гэх үндэслэлээр эгүүлэн татах албан бичгийг УИХ-д хүргүүлсэн нь хачирхалтай.
Эндээс харахад Ерөнхийлөгч Х.Баттулга бүрэн эрхээ хараахан ойлгоогүй яваа бололтой. Эс бөгөөс Тамгын газрынхан нь Б.Дэлгэрмаагийн өргөдлийг нь Төрийн тэргүүнд хүргүүлэлгүй хав дарсаар ийм байдалд хүргэсэн болж таарах нь.
Тийм биш бол нэгэнт өргөдлөө өгсөн хүнийг улс төрийн шийдвэр гаргасан гэсэн шалтгаанаар эгүүлэн татах асуудал оруулж ирсэн нь Д.Эрдэнэбат гишүүний хэлсэнчлэн жинхнээсээ улстөржүүлсэн шийдвэр биш гэж үү. Б.Дэлгэрмаа АН-ын дэд дарга болсон нь ийм учиртай байж.
Г.Сонор
Сэтгэгдэл (27)