УИХ-ын өнөөдрийн нэгдсэн чуулганаар Засгийн газраас өргөн мэдүүлсэн Ус бохирдуулсны төлбөрийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэх асуудлаар санал хураалт явуулж гишүүдийн олонх дэмжлээ. Ингэснээр уг хуулийн төслийг анхны хэлэлцүүлэгт шилжүүлэхээр болж байгаа юм.

Хуулийн төслийг А.Сүхбат нарын гишүүн санаачилсан юм. Энэ талаар гишүүн А.Сүхбат “Туул гол бол монголчуудын амин сүнс. Туул гол хорлон сүйтгэх ажиллагаа хийсэн гэж болно. Туул голыг хаанаас бохирдуулаад байна гэхээр Тэрэлжийн жуулчны баазаас бохирдуулж эхэлж байна. Бүгд нүхэн жорлонтой. Туул голоос ундаалсан малын арьс нь өмөрч унаж байна. Махыг нь иргэд идэж байна. Туул голоос ундаалсан малын мах, бусад бүтээгдэхүүнийг худалдаанд гаргахгүй гэдэг асуудлыг удахгүй Засгийн газарт оруулж ирнэ. Ер нь Улаанбаатар хотын ард иргэд хоногт 200 сая литр усыг дахин ашиглахгүйгээр Туул гол руу нийлүүлдэг. Бусад улс оронд хоёр, гурван удаа хэрэглэдэг. Хэрэглэсэн усаа олигтой ч цэвэршүүлэхгүй 70 хувь орчмын бохирдолтойгоор Туул голд нийлүүлдэг. Туул голын загас, жараахай хүртэл бүгд охин сүвтэй болчихсон. Амьтан болох Алтанбулагийн тарвага хүртэл хээл хаяж байна. Малын гэдэс нь идэхийн аргагүй  тас хар. Олон тариалангийн компаниуд Туул голоос ногоогоо усалж байгаа. Тэр бүхнийг худалдаж авч болохгүй шүү гээд хориглож чадаагүй. Хаа хаанаа хариуцлага ярих цаг нь болсон” хэмээн чуулганы нэгдсэн хуралдаан, хэвлэл мэдээллийн хэрэгслээр өөрийн байр сууриа илэрхийлж байсан юм.

Харин уг хуулийн төслийг УИХ-ын нэгдсэн чуулганаар хэлэлцэхийг гишүүдийн олонх дэмжсэний дараа УИХ-ын гишүүн А.Сүхбат санал өгсөн гишүүн бүртэй гар барьж, баярласнаа илэрхийлсэн юм. Магадгүй Туул голыг “аврах” А.Сүхбат гишүүний санаачилга эхний алхмаа давсанд тэрбээр ийнхүү баярласан байж болох.

Р.Хишигээ