УИХ-ын чуулганы нэгдсэн хуралдаанаар Захиргааны ерөнхий хуульд өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэхээр санал хурааж, гишүүдийн олонхи дэмжсэн юм. Энэ үеэр УИХ-ын гишүүн Н.Оюундарь “Сүүлийн үед бид нэг тохиолдол, нэг цаг орон зайд зориулсан хууль батлах гээд болдог болж. Энэ хуулийн төслийг хууль санаачлагачдад нь буцаах хэрэгтэй. Яагаад Захиргааны хуульд нэмэлт өөрчлөлт оруулах болов. Засгийн газрын шийдвэрийг хууль зөрчсөн гэж Захиргааны хэргээр хэдэн маргаан шийдвэрлэдэг вэ? Шүүхээс Засгийн газар хууль зөрчсөн гэж жилд хэдэн удаа шийдвэр гардаг вэ? Энэ хуулийн төслийг эсэргүүцэж хуульчид гишүүдэд санал хүргүүлснийг хүлээж авсан уу?” гэсэн асуултыг Хууль зүй, дотоо хэргийн сайд Ц.Нямдоржид дайсан юм.

Хариуд нь сайд Ц.Нямдорж “Н.Оюундарь гишүүнийг ийм асуулт тавьж байгаад харамсаж байна. “Эрдэнэт”-ийн 49 хувийг хэлэлцэж байхад мундаг зүйл хийж байна гэж магтаж магтчихаад маргааш нь бултчихсан байх аа. Үүнийг чинь би мартаагүй байгаа шүү.

Засгийн газрын шийдвэр, түүнийг хэрэгжүүлэх шийдвэр гэсэн чиглэлээр өөрчлөлт оруулж байна. Засгийн газар олон хүн томилдоггүй. Дэд сайд, агентлагийн дарга нарыг томилдог. Хааяа улсын үйлдвэрийн захирлыг томилдог. Сайдын тушаалаар халагдсан хүмүүс Захиргааны хэргээр явна. Энэ нь Засгийн газрын шийдвэр гэдгээрээ онцлогтой. Шүүх бол Үндсэн хуулийг биелүүлэх ёстой. Гэтэл тийм биш болсныг өмөөрөөд байгааг чинь мэдэхгүй байна.

Засгийн газрын тогтоол захирамж нь хууль тогтоомжид нийцээгүй бол Засгийн газар өөрөө буюу УИХ хүчингүй болгоно гэж байгаа юм. Цэцийн шийдвэр гармагц хүчин төгөлдөр болно гэж байгаа. Засгийн газрын шийдвэрийг Захиргааны шүүх хянахгүй гэсэн заалт хүчинтэй. Үндсэн хуулийн заалт ийм байхад авлигад идэгдсэн шүүгч Цэцийн шийдвэрийг зөрчөөд байхаар нь асуудал оруулж байна. Наад хуульч нарын эсэргүүцэл чинь Үндсэн хуулийн эсрэг зохион байгуулагдсан.

Энэ өргөн мэдүүлсэн төслийг уншихгүй мушгиад байх юм. Захиргааны шүүхэд иргэдийн хандах эрхийг Засгийн газар булааж авах гэж байна гээд байх юм. Засгийн газар томилдог хүмүүсийг би хэлсэн. Үндсэн хуулийн заалтыг нь мөрдүүлэх гэж оруулж байгаа юм.

Би луйврын сүлжээг таслах гэж зүтгээд байгаа юм. Ч.Сайханбилэгт ордны гадна хаалган дээр авчирч өгсөн орос бичгийн ноорогт TDB компани хувьчлахыг зөвшөөрнө гэж бичсэн. Тэр нь ХХБ. Гэтэл одоо хүртэл Орхон гэдэг хүн УИХ-д ирээд “ХХБ огт хамаагүй гээд байгаа юм. Тэгээд Монголбанкнаас мөнгийг нь гаргаж өгөөд, 27 настай хүүхдэд компани өгөөд. Та нар одоо үүнийг өмөөрөхгүй байх” гэлээ.

С.Сүлд