УИХ дахь АН-ын зөвлөлийн өнөөдрийн хуралдаанаар хэлэлцсэн асуудлын талаар УИХ-ын гишүүн Д.Эрдэнэбат мэдээллээ. Тэрбээр “Эрдэнэт үйлдвэрийн асуудлыг Засгийн газрын үйл ажиллагааны мөрийн хөтөлбөрийн дүгнэлт, “Эрсдэлийн”-гаас “Стандарт” банкны өрийг төлсөнтэй холбоотойгоор Б.Пүрэвдорж гишүүнээр ахлуулсан ажлын хэсгийг гаргаж ажиллаа. Хурлаар ажлын хэсгийн дүгнэлтийг сонссон. Зөвлөлөөс Засгийн газар болон хууль хяналтын байгууллагад тодорхой санал хүсэлтийг гаргаж хүргүүлэх нь зүйтэй гэж үзлээ. Цаашид луйврын санхүүгийн эх үүсвэр болсон байж болзошгүй энэ үйлдлийг таслан зогсоох, тэр дундаа зэсийн баяжмалын борлуулалтын асуудлыг ил тод болгох чухал шаардлага үүссэн байна. Нийт хохирлын дүн нь 143 тэрбум төгрөг. Энэ төлбөрийг буруутай эздээр нь нэн яаралтай төлүүлж улсыг хохиролгүй болгох шаардлагатай.

Б.Пүрэвдорж гишүүнээр ахлуулсан ажлын хэсэг зөвхөн “Стандарт” банктай холбогдох өрийг барагдуулах зардал нь 40 сая ам доллароос гадна 38 тэрбум орчим төгрөг гэдгийг тогтоосон. Энэ бол яах аргагүй бодит хохирол мөн. Үүнийг хохиролыг хэн төлөх нь тодорхойгүй байна. “Эрдэнэт” үйлдвэрийн буруутай энэ үйлдлийг эрх баригчид ярихгүй, дуугүй байгааг гайхаж байна. “Эрдэнэт”  үйлдвэрт үүссэн асуудлыг бүхэлд нь ярих ёстой. Хэрвээ асуудалд шударга хандая гэж байгаа бол бүгдийг нь ижил тэгш шалгаж үзэн, үнэн зөвийг нь олон нийтэд мэдээлэх шаардлагатай” гэлээ.

Мөн энэ талаар УИХ-ын гишүүн Б.Пүрэвдорж ““Жаст”-ын Ш.Батхүүтэй холбогдсон “Эрдэнэт” үйлдвэрийн энэ зээлд “Ocen partners” компани холбогддог. 1998 оноос хойш энэ компани нийт 21 жилийн турш “Эрдэнэт” үйлдвэрийн зэсийн баяжмалыг авч борлуулдаг трейдер компани. Зээлийг авахад анх энэ компани зуучилсан. Тиймээс “Жаст”-ын Ш.Батхүүгийн авсан зээлийн буцаан төлөлтийн 48 сая ам.долларыг “Ocen partners” компани төлсөн байна. Ингэхдээ зэсийн баяжмалын төлбөрөөс төлсөн. Тиймээс энэ компани анхнаасаа уг луйварт хамжигчаар оролцсон. “Ocen partners” нь трейдер компани байж олон улсын өрийн зуучлалын үйл ажиллагаанд оролцсон байна. Эндээс “Стандарт” банк бол нэр төдий, луйвар хийхэд ашиглагдсан банк юм байна. “Ocen partners” компани нь өөрөө зээл өгч, зээл авахад нь оролцсон болох нь харагдаж байна” гэв.

Р.Хишигээ