Ардчилсан намын дарга, Ерөнхий сайд асан Н.Алтанхуягийг намын гишүүнээс нь чөлөөлсөн тухай мэдээлэл өнгөрсөн амралтын өдрүүдийн гол сэдвийн нэг байв. Албан ёсны бичиг нь гарч ирээгүй ч энэ тухай мэдээлэл сошиалын гол сэдэв байлаа. Сошиалын мэдээллээр бол АН-ын одоогийн дарга С.Эрдэнэ намаа хэд хэдэн удаа ялуулсан Н.Алтанхуягийг намын санхүү, эд хөрөнгийн бүртгэлээс найман тэрбум төгрөгийг завшсан гэж үзжээ. Тодруулбал Н.Алтанхуяг АН-ын даргаар ажиллах хугацаандаа Соёлын төв өргөөний хүзүүвчинд байрлах намын байрыг долоон тэрбум төгрөгөөр зарсан, "Намын шинэ байр барина" хэмээн  хандив цуглуулж, уг мөнгөнөөсөө "Лексус 570" автомашин авч түүнийгээ хүлээлгэж өгөөгүй гэжээ.

Гэхдээ намын байраа зарсан талаар албан ёсны байр суурь аль аль тал нь илэрхийлээгүй байдаг ч 2016 онд УИХ-ын гишүүн Г.Батхүүгийн хэлсэн үг анхаарал татаж байгаа юм. Тэрбээр өдгөө АН-ын дэд даргын албыг хашдаг гэдгийг дашрамд тодруулъя.

2016 онд намынхныхаа уулзалт дээр одоогийн АН-ын дэд дарга Г.Батхүү “АН-ын байрыг зарахын тулд намаас ажлын хэсэг байгуулаад ажилласан. Ерөнхийлөгчийн сонгуульд сонгогдохын тулд намаа өртэй болгож, бүх юмаа зарцуулж байгаа байхгүй юу. Хоёр Ерөнхийлөгчийн сонгуулийн өр гурван тэрбум төгрөгийг төлөхийн тулд АН-ын үндсэн байр болох хүзүүвчийг зарж дарсан шүү дээ. Хуучин Социал демократ намын намын байр байсан газарт 24 давхар байшин бариад хоёр давхар оффис, хоёр давхар гараашийг нь үнэгүй авахаар хөрөнгө оруулагчтайгаа гэрээ хийх гэж байхад тендер зарлаад зарчихсан биз дээ. Өрөнд өгснөөс бүх юм болохоо байлаа” хэмээн ярьж байжээ. Түүний хэлсэн үнэн бол АН-ын байрыг намаасаа нэр дэвшсэн Ц.Элбэгдоржийн хоёр удаагийн сонгуульд зориулаад зарчихсан бололтой юм. Ардчилсан Ерөнхийлөгч ийм үнээр төрсөн ажээ.

С.Сүлд