2018 оны арван нэгдүгээр сарын 14-нд УИХ-ын дарга асан М.Энхболд Ерөнхий аудитор Д.Хүрэлбаатарыг үүрэг ажлаасаа татгалзах хүсэлтээ өөрөө өгөхийг шаардсан билээ. Тэрбээр “Ядуурлыг бууруулах, ажлын байр бий болгох, жижиг дунд үйлдвэрлэлийн хөгжлийг дэмжих зориулалттай, иргэд, жижиг  аж ахуй эрхлэгчдэд зориулсан зээлээс төрийн өндөр албан тушаалтнууд эрх мэдлээ ашиглан их хэмжээгээр авсанд иргэд, олон нийт ихээхэн шүүмжлэлтэй хандаж байгааг та мэднэ. Зээл авсан төрийн албан тушаалтнуудад хариуцлага тооцохыг шаардаж, бичиг захидал хүртэл олноор ирүүлж байна.

Миний хувьд үүнийг шударга шаардлага гэж үзэж байна. Албан тушаал, эрх мэдлээ ашиглаж, өөрийн хамаарал бүхий компанид их хэмжээний зээл авсан байж болзошгүй үйлдэлд УИХ-ын дэргэдэх байгууллага Үндэсний аудитын газрын дарга таны нэр холбогдсон. Тиймээс та хариуцлага хүлээх ёстой. Би Таныг энэ албан тушаалыг хаших ёс зүйн эрхгүй гэж үзээд өргөдлөө өгөхийг шаардаж байна” гэсэн юм.

Хариуд нь Ерөнхий аудитор Д.Хүрэлбаатар “Хамаарал бүхий компани, авсан зээлийнхээ талаар товч тайлбарлаад, иргэд олон түмний болон таны шаардлагыг хүндэтгэж байна. Ойрын үед өргөдлөө өгөх болно” хэмээн хэлсэн юм. Ингээд тэрбээр албан ажлаасаа чөлөөлөгдөх хүсэлтээ тавьснаар уг асуудал Төсвийн байнгын хорооны хуралдаанаар хэлэлцэгдэж, Байнгын хорооны гишүүдийн 100 хувийн саналаар дэмжигдсэн.

Энэ үеэр УИХ-ын гишүүн Ж.Мөнхбат “Ерөнхий аудитор Д.Хүрэлбаатар Монголын төрд зөв жишиг тогтоож байна гэж бодож байна. Олон сайд нар, эрх мэдэлтнүүд албан тушаалтайгаа зууралдаж хойшоо сууж байхад хуулийн дагуу асуудлаа шийдүүлье гэж байгаа нь сайн хэрэг. ЖДҮХС-гаас зээл авсан сайд нар энэ хүнээс жишээ авах хэрэгтэй. УИХ-ын дарга ЖДҮХС-тай холбоотой асуудлаар хариуцлага тооцуулж эхэллээ гэж ойлгож байна. Ёсзүйн хороогоор нэр холбогдсон гишүүдийн асуудлыг хэлэлцэх чиглэл өгсөн байна. Ерөнхийлөгч эл асуудалд алхам хийгээд эхэлсэн. ЖДҮХС-тай холбогдсон зөвлөх, хэвлэлийн албаны даргаа ажлаас нь чөлөөллөө. Харин Засгийн газар энэ асуудалд хойрго хандаж байна. УИХ, ард түмэн шахаж шаардаад байхад ЖДҮХС-гаас зээл авсан сайд нараа оруулж ирдэггүй. Засгийн газар тэнгэрээс буугаад ирээгүй УИХ-аас томилогддог. Хэрэв энэ сайд нартаа хариуцлага тооцохгүй юм бол УИХ тарах ёстой” хэмээж байсан билээ.

Ерөнхий аудитор Д.Хүрэлбаатарын эзэмшлийн “Цэн стайл” компанийг түүний эхнэр үүсгэн байгуулсан бөгөөд оёдлын чиглэлээр 14 жил үйл ажиллагаа явуулж байгаа аж. Уг компани нь ЖДҮХС-гаас 750 сая төгрөгийн зээл авсан. Ингэхдээ хууль зөрчсөн эсэхээ шалгуулахаар өөрийн албан ажлаасаа түдгэлзсэн ч өдийг хүртэл хуулийн байгууллагаас хариу мэдээлээгүй байгаа юм. Үүнээс харахад түүнийг хууль зөрчөөгүй гэж үзэх хүн байгаа юм. Хуулийн байгууллагын дүгнэлт гараагүй байхад урьдчилан хууль зөрчөөгүй, зөрчсөн гэж дүгнэх нь буруу гэдгийг ч олон хүн хэлж буй.

Тэгвэл энэ асуудлыг чуулганы нэгдсэн хуралдаанаар эцэслэн шийдвэрлэх бололтой. Өөрөөр хэлбэл, энэ долоо хоногт чуулганы нэгдсэн хуралдаанаар хэлэлцэх асуудлын дараалалд аудитор Д.Хүрэлбаатарыг үүрэгт ажлаас нь чөлөөлөх эсэх тухай асуудал хэлэлцэх юм. Магадгүй хууль хяналтын байгууллагаас урьтаж хууль тогтоох дээд байгууллагаас Д.Хүрэлбаатарыг чөлөөлөх эсэх асуудлыг хэлэлцэхээр оруулж ирсэн нь энэ бололтой.

Р.Хишигээ