МАН-ын IV Бага хурал өчигдөр болж, Хэнтий аймгийн 42 дугаар нөхөн сонгуульд МАН оролцох нь зүйтэй гэсэн шийдвэр гаргасан. Энэ хүрээнд УИХ дахь МАН-ын бүлгийн дарга Х.Тогтохсүрэн төлөөлөгч нарын хамт Сонгуулийн ерөнхий хороон дээр ирж намаа бүртгүүллээ. Энэ үеэр тэрбээр "УИХ-ын сонгуулийн 42 дугаар тойрогт 2016 онд сонгогдсон Д.Гантулга өнгөрсөн онд өөрийн хүсэлтээр УИХ-ын гишүүний бүрэн эрхээсээ татгалзсан. Энэ хүрээнд УИХ-ын хоёр удаа шийдвэр гаргасан. Хамгийн сүүлийн шийдвэрээр сонгуулийг ирэх зургадугаар сарын 30-ны өдөр зохион байгуулахаар товлосон.
Түүнчлэн өчигдөр уг асуудлыг МАН-ын IV Бага хурлаар хэлэлцэж Хэнтий аймаг дахь 42 дугаар нөхөн сонгуульд оролцохоо албан ёсоор илэрхийлсэн.
Тиймээс Сонгуулийн ерөнхий хороонд холбогдох бичиг баримтыг өнөөдөр ийн бүрдүүлэн өглөө. Нэр дэвшигчийг хуулийн дагуу ирэх сарын 24-28 өдрүүдэд намын бага хурлаараа шийднэ. Өнөөдрийн хувьд нэр дэвшигчийн асуудал хараахан тодорхой болоогүй байна. Тойргоо судалж байна.
Мөн МАН-ын дарга нэр дэвших боломжтой хүмүүсийн нэг юм.
Энэ сонгууль Монголын улс төрийн намуудын рейтингийг тогтоосон сонгууль болох байх гэж бодож байна. МАН-ын зүгээс хариуцлагатай оролцоно" гэлээ.
Б.Лхам
